इटहरी/ छायांकनको लागी तयारीमा रहेको फिल्म ‘होस्टेल ३’ मा अभिनेता आर्यन सिग्देल र अभिनेत्री परीक्षा लिम्बु मुख्य भूमिकामा देखिने भएका छन् । जहाँ आर्यनले ‘वार्डेन’को भूमिका निभाउनेछन् भने परीक्षाले विशेष भूमिका पाउनेछिन् । यसअघि आर्यन र परीक्षाले ‘पुजार सार्की’मा एकसाथ काम गरेका थिए, जसमा उनीहरूको अभिनयलाई सकारात्मक समिक्षा प्राप्त भएको थियो।
‘होस्टेल ३’ मा आर्यन र परीक्षासँगै पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, र सन्तोष बानियाँले पनि अभिनय गर्नेछन् । निर्माण पक्षले फिल्मलाई फागुन १६ गते विश्वभर एकसाथ रिलिज गर्ने योजना बनाएको छ ।
‘होस्टेल’को पहिलो शृङ्खलाले अनमोल केसी, सलोन बस्नेत र प्रकृति श्रेष्ठ जस्ता नयाँ कलाकारलाई स्थापित गरेको थियो भने ‘होस्टेल रिटर्न्स’ बाट स्वस्तिमा खड्का, सुशील श्रेष्ठ र नजिर हुसेनले नेपाली फिल्म क्षेत्रमा सफलता हासिल गरेका थिए । यस शृङ्खलाले नेपाली फिल्म उद्योगमा नयाँ प्रतिभा ल्याउने प्लेटफर्मको रूपमा ख्याति कमाएको छ ।
फिल्म ‘होस्टेल ३’को कथा माधव शर्माले लेखेका हुन् भने निर्देशन सुरेश कँडेलको रहेको छ । यसलाई सम्मान इन्टरटेन्मेन्टले आरोन कन फिल्म्ससँगको सहकार्यमा निर्माण गर्दै छ । कार्यकारी निर्माता शंकर कोइराला हुन् भने निर्माता कर्ण कार्की र गोविन्द अधिकारी रहेका छन् ।
Discussion about this post