को-को छन् फिल्म ‘१२ गाउँ’को प्रमुख भुमिकामा ?

इटहरी/ यहि आउँदो दशैँलाई लक्षित गरेर असोज २४ गतेबाट सार्वजनिक प्रदर्शनमा आउन लागेको फिल्म ‘१२ गाउँ’ को नयाँ पोस्टर बुधबार सार्वजनिक गरिएको छ । फिल्मका निर्देशक तथा अभिनेता बिराज भट्टले आफ्नो सामाजिक सञ्जालमार्फत पोस्टर सार्वजनिक गरेका हुन् । यसअघि फिल्मका पोस्टरमा बिराज र उनका छोरा समीर भट्टलाई मात्रै प्रस्तुत गरिएको थियो, तर अहिले भने फिल्मका सबै प्रमुख कलाकारहरूको क्यारेक्टर झल्काउने पोस्टर सार्वजनिक गरिएको हो । जसले फिल्मप्रति दर्शकहरूमा थप उत्सुकता जगाएको छ ।

पोस्टरमा बिराज र उनका छोरा अर्थात डेब्यु अभिनेता समीर भट्टका साथमा सनिशा भट्टराई, न्यान्सी खड्का, सोनु चन्द्रपाल, नरेन खड्का र सुलेमान शंकर (इकु) समेत देखिएका छन् । यी कलाकारहरूले फिल्ममा महत्त्वपूर्ण भूमिका निर्वाह गर्नेछन्, जसको कारणले पनि फिल्मप्रति दर्शकहरूको आकर्षण बढ्दै गएको छ ।

‘१२ गाउँ’ एक एक्सन–थ्रिलर फिल्म हो, जसको लेखन सन्तोष सरकारले गरेका छन् । फिल्ममा एक्सन दृश्यहरूलाई विशेष महत्त्व दिइएको छ । जसका लागि तमिल र कन्नड फिल्मका चर्चित द्वन्द्व निर्देशक स्टन्ट सिल्भाले द्वन्द निर्देशन गरेका हुन् भने उनलाई नेपाली द्वन्द्व निर्देशक शंकर महर्जनले सघाएका छन् । फिल्ममा प्रस्तुत गरिएका द्वन्द्व दृश्यहरूलाई अझ प्रभावशाली बनाउन यो सहकार्य गरिएको हो ।

यसअघि ‘१२ गाउँ’ को टिजर र एउटा गीत सार्वजनिक गरिएको थियो, जसले दर्शकहरूबाट सकारात्मक प्रतिक्रिया पाईरहेको छ । फिल्मको कथा र प्रस्तुतिले दर्शकहरूमा यसप्रति थप आकर्षण बढाएको छ । फिल्ममा उत्कृष्ट एक्सन, सस्पेन्स, र थ्रिलका साथै परिवार, प्रेम, र बलिदानका तत्वहरू समेटिएको अनुमान गरिएको छ । बिराज भट्टको निर्देशनमा बनेको यो फिल्मले नेपाली सिनेमा जगतमा नयाँ उचाइ कायम गर्ने विश्वास गरिएको छ । बिराज भट्ट फिल्मस प्रालीको ब्यानरमा निर्माण भएको यो फिल्म निर्माता सरस्वती भट्ट हुन् ।