इटहरी/ कोशी प्रदेशस्तरीय पहिलो ‘मिसेस पुर्बेली आइकन-२०२४’ सौन्दर्य प्रतियोगिता ओपन स्पेस प्रालीको आयोजनामा इटहरीमा भैरहेको छ । यो प्रतियोगिता विवाहित महिलाहरूको व्यक्तित्व विकास, सीप अभिवृद्धि, बौद्धिक क्षमतामा सुधार र महिला सशक्तीकरणको क्षेत्रमा योगदान पुर्याउने उद्देश्य राखिएको छ । शुभेक्षा कार्किले कोरियोग्राफी गरिरहेको उक्त प्रतियोगितामा ८ जना प्रतिस्पर्धीहरू सहभागी छन् भने यी ८ मध्ये एक हुन् रुबिना श्रेष्ठ ।
उनको जन्मस्थान सुनसरीको इनरुवा-१, आदर्श टोल हो । स्वर्गीय बुवा प्रकाश श्रेष्ठ र आमा अम्बिका श्रेष्ठको कोखबाट यो धर्तीमा जन्म लिएकी उनले आफ्नो पढाइ हाललाई भने स्थगित गरेकी छन् । सामान्य परिवारमा जन्म लिएकी उनी बाल्यकालमा निकै लजालु स्वभावकी थिइन् । अरूसँग बोल्न डराउने र आफ्नो काममा मात्रै ध्यान दिने गरेको उनले स्मरण गर्छिन् ।
अमेरिका जाने ठूलो सपना बोकेको उनलाई डिभी पनि पर्यो । तर, सेकेन्ड लेटर नआएकाले जान नपाएको उनले सुनाईन् । तर अमेरिका जान नपाएपनी आफ्नो जीवनसँग सन्तुष्ट रहँदै नेपालमै जागिर खाएर खुसीपूर्वक बाँचिरहेकी छन् रुबिना । हाल पढाइ छोडेकी उनले युवावस्थामा प्लस टु सम्म पढाइ गरेकी थिइन् । किशोरावस्थामा आफूले चाहेको लक्ष्य पूरा गर्न दृढ रही काम गर्दै आएकी उनी परिवारको सल्लाह लिएर हरेक कदम अगाडि बढाउने गरेको बताउँछिन् । हेर्नुस् उनिसंग गरिएको भिडियो कुराकानी ।
हाल उनी सानिमा रिलायन्स लाइफ इन्स्योरेन्स कम्पनीको धरान पानबारी शाखामा कार्यरत छिन् । जहाँ उनी ७ वर्षदेखी निरन्तर कार्यरत छिन् । २०७१ सालमा सन्तोष कुमार श्रेष्ठसंग मागी विवाह गरेकी उनले विवाहपछिको जीवनमा श्रीमान् तथा परिवारबाट पूर्ण समर्थन प्राप्त गर्दै आएकी छन् । यसअघि कुनै सौन्दर्य प्रतियोगितामा सहभागी नभए पनि ‘मिसेस पुर्बेली आइकन’मा सहभागी भएपछि बौद्धिक क्षमतामा वृद्धि भएको अनुभव सुनाउछिन् ।
साथीभाइ, घर र माइतीबाट पनि सकारात्मक प्रतिक्रिया पाइरहेकी उनले विवाहअघि देखेका सपना पूरा हुँदै गएको बताइन् । यो प्रतियोगितामा नजिते पनि यहाँसम्म आइपुग्नुलाई नै आफ्नो जित मानेकी उनी यदि यो प्रतियोगिता जितेको खण्डमा अनाथ आश्रममा केही सहयोग गर्ने योजना बनाएकी छन् । ‘मिसेस पुर्बेली आइकन’ प्रतियोगिता महिलाहरूको व्यक्तित्व र सीपलाई निखार्ने एक महत्वपूर्ण प्लेटफर्मको रूपमा खडा भएको छ ।
Discussion about this post