फिल्म ‘हरिबहादुरको जुत्ता’ निर्माण हुने, प्रमुख भुमिकामा हरिबंश आचार्य र प्रकाश सपुत

इटहरी/ चलचित्र ‘हरिबहादुरको जुत्ता’ निर्माण हुने भएको छ ।जसमा प्रमुख भूमिकामा अभिनेता हरिवंश आचार्य र प्रकाश सपुत रहनेछन् । यो फिल्मलाई चर्चित निर्देशक दिपेन्द्र के खनालले निर्देशन गर्नेछन् भने गायक तथा म्युजिक भिडियो निर्माता सरोज ओलीले निर्माण गर्दैछन् । बुधबार चलचित्र विकास बोर्डमा नाम दर्ता गराएपछि फिल्मको निर्माण इजाजत लिइएको हो ।

फिल्मको पटकथा र संवाद हरिवंश आचार्य आफैंले लेखेका छन् । आचार्यले भने, “मेरो मनमा एक अनौठो कन्सेप्ट आइरहेको थियो, जुन म सरोज ओली भाइलाई सुनाएँ । उहाँले यसमा फिल्म निर्माण गर्ने उत्साह देखाउनुभयो र मलाई प्रमुख भूमिकामा लिनुभयो । आइडिया निकै अनौठो छ र म विश्वस्त छु कि फिल्म उत्कृष्ट बन्नेछ ।”

हरिवंश आचार्य र सरोज ओलीले यसअघि म्युजिक भिडियोमा सहकार्य गरेका थिए तर यो फिल्म ओलीको पहिलो चलचित्र निर्माण हुनेछ । निर्माता ओलीले भने, “करिब २५ वर्षदेखि कला क्षेत्रमा काम गरिरहेको भए पनि फिल्म निर्माणको अवसर कहिल्यै मिलेको थिएन । तर हरिवंश दाइले यो अनौठो कन्सेप्ट सुनाएपछि मैले फिल्म निर्माण गर्ने निर्णय गरेँ ।”

यता यो फिल्ममा निर्देशक दिपेन्द्र खनालको हरिवंश र प्रकाशसँग पहिलो सहकार्य हुनेछ । प्रकाश सपुतले भने, “म सानैदेखि हरिवंश दाइलाई टेलिभिजनमा देखेर हुर्किएको हुँ । फिल्ममा काम गर्न पाउँदा म निकै खुशी छु । यो फिल्मले तीन फरक पुस्ताका कलाकर्मीहरूलाई एकसाथ ल्याएको छ, जुन विशेष हुनेछ भन्नेमा म आशावादी छु ।” फिल्मको बाँकी कलाकार तथा प्राविधिक टोली छनोट हुन बाँकी छ भने कथा बारे पनि अहिले नै सार्वजनिक गरिएको छैन ।