तिहारमा पल शाह र प्रदीप खड्का बिच प्रतिष्पर्धा हुने पक्का

इटहरी/ दशैंको रौनक मेट्न नपाउँदै तिहारमा नेपाली सिनेप्रेमीहरूका लागि दुई ठूला फिल्महरूको भिडन्त हुने भएको छ । कार्तिक १५ गतेका दिन दुई चर्चित नेपाली नायकहरू पल शाह र प्रदीप खड्काबीच बक्स अफिसमा प्रतिस्पर्धा हुने भएको हो । यी २ को ‘एक्टर’ र ‘मायावी’ मार्फत भिडन्त हुने देखिएको हो । निर्देशक दिवाकर भट्टराईको बहुप्रतीक्षित फिल्म ‘मायाबी’ तिहारको अवसरमा कार्तिक १५ गतेदेखि प्रदर्शनमा आउँदैछ ।

यो फिल्म निर्माण भएको लामो समयपछि अन्ततः तिहारलाई रिलिज मिति तय गरिएको छ । फिल्ममा पल शाहसँगै दीपिका प्रसाई, करिश्मा श्रेष्ठ, सुशील सिटौला, र समिम खानको पनि मुख्य भूमिका रहेको छ । त्यही दिन, प्रदीप खड्काको मुख्य भूमिका रहेको फिल्म ‘एक्टर’ पनि रिलिज हुँदैछ । निर्देशक हेमराज बिसीको यस फिल्मले प्रदीपलाई नयाँ अवतारमा प्रस्तुत गर्ने बताइएको छ ।

‘एक्टर’ले मनोरञ्जनसँगै गहिरो कथा बोकेको दाबी गर्दै दर्शकहरूलाई आकर्षित गर्न खोजेको छ । यसरी कार्तिक १५ मा दुई ठूला नेपाली नायकहरूको फिल्म रिलिज हुने हुँदा बक्स अफिसमा कस्तो नतिजा आउने हो भन्ने कुराले सबैको ध्यान खिचेको छ । पल शाहको ‘मायाबी’ र प्रदीप खड्काको ‘एक्टर’बीचको यो भिडन्तले दर्शकहरूलाई तिहारको समयमा छुट्टै मनोरञ्जन दिने पक्का छ । पल र प्रदिप अभिनित पछिल्लो फिल्म ‘पुजार सार्की’ हो । यो फिल्मले संतोषजनक व्यापार गरेको थियो ।