सुशीलको एक्सनले भरिएको फिल्म ‘आउटल: दफा २१९’को रिलिज मिति सर्यो

इटहरी/ फिल्म ‘आउटल: दफा २१९’ को रिलिज मिति असोज ३ गतेका लागि तय गरिएको भए पनि निर्माणपक्षले हालै यसको प्रदर्शनलाई स्थगित गर्ने निर्णय गरेको छ । फिल्म युनिटले आज एक विज्ञप्ति मार्फत फिल्मको छायांकन र प्राविधिक पक्षहरू पूरा नभएकाले निर्धारित मितिमा फिल्म रिलिज सम्भव नभएको जानकारी दिएको छ । दर्शकलाई उत्कृष्ट फिल्म उपलब्ध गराउन समय लागिरहेको भन्दै निर्माणपक्षले यसबारेमा धैर्य राख्न आग्रह गरेको छ ।

फिल्मको फस्टलुक र टिजरले राम्रो प्रतिक्रिया पाएपछि निर्माणपक्ष उत्साहित भएपनि कामको गुणस्तरलाई प्राथमिकता दिँदै नयाँ मिति तय गर्नका लागि समय लिएको हो । ‘आउटल: दफा २१९’ विक्की महर्जनको लेखन तथा निर्देशनमा निर्माण भएको छ । फिल्ममा सुशील श्रेष्ठ, नरेश पौडेल, शिक्षा संग्रौला, सुमन भण्डारी, हेम गुरुङ, सोनी लागुन, र विशाल पहारी मुख्य भूमिकामा देखिनेछन् ।

फिल्मका लगानीकर्ता अमित अग्रहरि हुन् भने कार्यकारी निर्माताको जिम्मेवारी विनोद कठायतले लिएका छन् । विकास चौधरी सह-निर्माताका रूपमा छन् । नविन गुरुङले डीओपी, चुल्ठे काजीले एक्सन र साहिल खानले सम्पादनको काम सम्हालिरहेका छन् । निर्माणपक्षले नयाँ रिलिज मिति छिट्टै सार्वजनिक गर्ने बताएको छ ।