कार्तिक ३० गतेदेखि ‘बमबहादुर’, फिल्ममा सौगात लडाकु लुक्समा

इटहरी/ फिल्म ‘बम बहादुर’ अब आगामी कार्तिक ३० गतेदेखि दर्शकमाझ आउने भएको छ । आइतबार निर्माण टोलीले रिलिज मिति र एक पोस्टर सार्वजनिक गर्दै प्रदर्शनको मिति घोषणा गरेको हो । पोस्टरमा अभिनेता सौगात मल्ललाई लडाकुको पोसाकमा प्रस्तुत गरिएको छ । फिल्मका निर्देशक जोन राईका अनुसार ‘बम बहादुर’ सस्पेन्स, थ्रिलर, रोमान्स र सामाजिक कथाको सम्मिश्रण हो । यो फिल्म बम बहादुर नामक पात्रको जीवनमा चार दशक अगाडिका घटनाहरूले अहिलेको जीवनलाई कसरी प्रभावित गरिरहेको छ भन्ने कथा बोकेको छ ।

निर्देशक राईले भने, “चलचित्रले बम बहादुरको बाल्यकालको स्मरण गराउँछ, जहाँ उनका खुसीका पलहरू विगतका अप्रत्याशित घटनाले बिथोल्छन् । फिल्मले वर्तमान र विगतको कथा जोड्दै एउटा नाटकीय क्लाइमेक्समा समापन पाउँछ ।” बिस्ट ब्रदर्स फिल्म्स प्रा.लि.को ब्यानरमा निर्मित यस फिल्ममा सौगात मल्लसहित प्रशान्त राई, अनिशा रसाइली, भास्कर प्रधान, महेन्द्र बग्दास, मदन भुजेल, भरत वशिष्ठ, रिया भुजेल, शान्तिला तामाङ, बाल कलाकार वाशित कार्की, सुरेश पाँचकोटी लगायतका कलाकारहरूको अभिनय रहेको छ ।

फिल्मको निर्माता सञ्जीव सार्की हुन् भने कथा र पटकथा जोन राई र रुपेश तामाङले लेखेका हुन् । छायाङ्कन सुजोय कुमार घोष ‘मुन्ना’ले गरेका छन् र सम्पादन ज्ञान गुरुङले, संगीत तथा गीत दीपङ्कर सिंह मुखियाले रचना गरेका हुन् भने ब्याकग्राउन्ड स्कोर इजाज अलीले तयार पारेका छन् । वितरणको जिम्मा आरआर फिल्म्सले लिएको छ भने पोस्ट प्रोडक्शन क्लासिक सिने युनिभर्समा गरिएको हो ।