इटहरी/ असोज ३ गते प्रदर्शनमा आउन लागेको फिल्म ‘खुस्मा’को दोस्रो गीत ‘रुकुम मैकोट’ सार्वजनिक भएको छ । आइतबार काठमाडौंको कमलपोखरीस्थित बिग मूभिजमा आयोजित एक विशेष कार्यक्रममा यो गीत सार्वजनिक गरिएको हो । गीतको संगीत निर्देशन एसडी योगीले गरेका छन् भने शब्द सुरेन्द्र रानाको रहेको छ । गीतमा संगीतकार योगी र शान्तिश्री परियारले स्वर दिएका छन् । भिडियोमा धिरज, उपासना र अन्य कलाकारहरु फिचर्ड छन् ।
सार्वजनिक भिडियोमा सुरेन्द्र राईको कोरियोग्राफी देख्न सकिन्छ भने संगीत निर्माणको जिम्मेवारी रिकेश गुरुङले लिएका छन् । फिल्म एम मिडिया प्रालिको ब्यानरमा निर्माण गरिएको हो, जसको लेखन तथा निर्देशन अशोक थापा मगरले गरेका छन् । यसअघि केही डकुमेन्ट्री सिनेमा निर्देशन गरिसकेका थापाको यो पहिलो ठुलो पर्दाको फिल्म हो । डकुमेन्ट्री विधामा उनले नौ वटा अन्तर्राष्ट्रिय फिल्म महोत्सवबाट पुरस्कार प्राप्त गरिसकेका छन् । हेर्नुस् गीत ।
फिल्मको निर्माण विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगरले गरेका हुन् भने सह-निर्मातामा सुस्मिता बुढाथोकी छन् । छायांकन दिपक बज्राचार्यको रहेको फिल्म दर्शकमाझ गीत र टिजरका कारण पहिले नै चर्चामा रहेको छ । फिल्ममा धिरज र उपासनासँगै माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र र विवेश मगरलगायतका कलाकारले अभिनय गरेका छन् । मगर समुदायको परिवेशमा आधारित प्रेमकथालाई लिएर बनेको यो फिल्म जनयुद्धको पृष्ठभूमिमा अंकुराएको प्रेमको कथालाई पर्दामा प्रस्तुत गर्नेछ ।
Discussion about this post