एक्सन जनरामा बन्ने फिल्म ‘हन्टर’ निर्माण घोषणा, मुख्य भूमिकामा अरुण क्षेत्री

इटहरी/ श्रीकृष्ण जन्माष्टमीको अवसर पारेर नयाँ नेपाली चलचित्र ‘हन्टर’ निर्माणको घोषणा गरिएको छ । निर्माण टिमले सोमबार मुख्य नायकबाहेक अन्य कलाकार र प्राविधिक टोलीलाई गोप्य राख्दै चलचित्रको नाम सार्वजनिक गरेको हो । यो चलचित्रलाई जीवन सिंहले निर्देशन गर्नेछन्, जसका लागि यो डेब्यु निर्देशन हुनेछ ।

चलचित्रको मुख्य भूमिकामा अरुण क्षेत्री रहनेछन्, जसले ‘महापुरुष’, ‘प्रेमा’, र ‘ज्याकी आईएम २१’ जस्ता चलचित्रमा आफ्नो अभिनय क्षमता प्रदर्शन गरिसकेका छन् । अन्य कलाकारको नाम केही दिनपछि घोषणा गरिने बताइएको छ । क्याच कुक इन्टरटेनमेन्ट प्रालिको प्रस्तुतिमा निर्माण हुने ‘हन्टर’ सुदूरपश्चिमको कथामा आधारित रहने छ ।

निर्देशक सिंहका अनुसार चलचित्र एक्सन जनरामा हुनेछ । उनले भने, “चलचित्र ‘हन्टर’ एक वास्तविक पात्रको कथाबाट प्रेरित छ, तर हामीले सिनेम्याटिक लिबर्टी लिएर यसलाई फिक्सनको साथ प्रस्तुत गर्नेछौँ । यसले चलचित्रलाई थप रोचक बनाउने विश्वास छ।” चलचित्रमा पिक एजुकेसन नेटवर्क र ट्राइडेन्ट कन्सेप्टको सहकार्य रहनेछ । चलचित्रको प्रि-प्रोडक्सन कार्य चलिरहेको छ भने छायांकन पश्चिम नेपालमा हुने बताइएको छ ।