फिल्म ‘सानो संसार’को प्रदर्शन मिति हेरफेर, अब असोज ११ गते प्रदर्शन हुने

इटहरी/ अर्जुन कुमारको लगानीमा बनेको फिल्म ‘सानो संसार’को प्रदर्शन मिति हेरफेर गरिएको छ । यसअघि असोज १७ गते घटस्थापनाको दिन रिलिज गर्ने योजना रहेको फिल्म अब एक हप्ता पहिले अर्थात असोज ११ गते प्रदर्शन गरिने भएको छ । फेसबुकमा फिल्म निर्माता अर्जुन कुमारले पोस्टर साझा गर्दै यो परिवर्तनको जानकारी दिएका छन् । उनले आफ्नो पोस्टमा भनेका छन्, ‘हाम्रो सिनेमा ‘सानो संसार’ अब एक हप्ता अगाडि रिलिज हुँदैछ । आगामी दिनमा तपाईंहरूको समर्थन र माया अपेक्षित छ।’

पारिवारिक कथामा आधारित यो फिल्ममा हास्य कलाकार केदार घिमिरे ‘माग्नेबुढा’की श्रीमती सीतादेवी तिमल्सेना प्रमुख भूमिकामा देखिनेछिन् । फिल्ममा राज पंगेनी शर्मा, अनु दाहाल, अन्जसा रिजाल, र शिशिर सिवाकोटी पनि अभिनय गर्दैछन्, जसले यसै फिल्मबाट नेपाली सिने क्षेत्रमा डेब्यु गर्दैछन् ।

यो फिल्म राजधानी मिडिया एड प्रोडक्सन र प्रिन्सेस मूभिजको ब्यानरमा निर्माण गरिएको हो, जसको कार्यकारी निर्माता माधव वाग्ले रहेका छन् । अर्जुन कुमारको राजधानी मिडिया र प्रिन्सेस मूभिजले फिल्म संयुक्त रूपमा वितरण गर्नेछन् । निर्देशक सिद्धार्थ पुडार्सनीको निर्देशनमा बनेको यो फिल्म उनको पहिलो लेखन र निर्देशन हो । फिल्म लेखनमा उनलाई सरिष्मा पुडासैनीले साथ दिएकी छन् । यस फिल्मको डिजिटल पार्टनर म्युजिक नेपाल र क्रिएटिभ पार्टनर टुनामुना कन्सेप्ट रहेका छन् ।