इटहरी/ लोकप्रिय टेलिफिल्म ‘सक्किगोनि’ टिमद्वारा निर्माणको तयारीमा रहेको फिल्म ‘लाज शरणम्’को कलाकार छनोट र प्रि-प्रोडक्सनको काम तीव्र गतिमा अगाडि बढिरहेको छ । फिल्मका लागी एकपछि अर्को प्रमुख कलाकार थपिँदै गइरहेका छन् । यो फिल्मको मुख्य भूमिकामा अधिकांश ‘सक्किगोनि’ टिमकै सदस्यहरू देखिनेछन् । गत साउनमा, लेखक तथा निर्देशक कुमार कट्टेलको जन्मदिनको अवसरमा फिल्मको औपचारिक निर्माण घोषणा गरिएको थियो ।
जसमा सागर लम्साल (बले), अर्जुन घिमिरे (पाँडे), र कमलमणी नेपाल (खुपीका बाउ)को अभिनय रहने कुरा सार्वजनिक गरिएको थियो । फिल्ममा सक्किगोनी टिम भन्दा बाहिरबाट मुकुन्द श्रेष्ठ, विजय बराल, महेश त्रिपाठी, रेनु नाथ योगी र माला लिम्बुको अभिनय फाइनल गरिएको थियो । यस्तै अन्य कलाकारहरूको नाम क्रमशः सार्वजनिक गरिने जानकारी दिइएको थियो । हालसम्म ‘सक्किगोनि’ टिमका रामभजन कामत, बबिन राई (गल्फने बाजे), प्रियना आचार्य (मुन्नी) फाईनल भैसकेका छन् ।
हालै, अभिनेता हरिष निरौला (कक्रोज) पनि यस फिल्मका लागी अनुबन्धित भएका छन् । जसको जानकारी बिहीबार सार्वजनिक गरिएको थियो । यो फिल्म भदौ तेस्रो सातादेखि फ्लोरमा जाने तयारीमा छ । जेपिटी क्रियसनको ब्यानरमा निर्माण हुने ‘लाज शरणम्’ फिल्मको रिलिज मिति फागुन १४ गते महाशिवरात्रीको अवसरमा तय भएको छ । यो फिल्ममा नवीन श्रेष्ठ निर्माता र राम नरेश शाह सह-निर्माताको रूपमा रहेका छन् ।
Discussion about this post