इटहरी/ फिल्म ‘रावायण’ले नेपाली सिनेप्रेमी दर्शकहरूको ध्यान आकर्षण गरिरहेको छ । यो फिल्ममा पल शाह र पूजा शर्मा प्रमुख भूमिकामा छन् । भदौ २१ गते रिलिजको तयारीमा रहेको यस फिल्मको ट्रेलर बिहीबार सार्वजनिक गरिएको थियो । सार्वजनिक भएको केही घण्टामै यो ट्रेलर युट्युब नेपालको मुभी क्याटोगरीमा ट्रेन्डिङको शिर्ष स्थानमा पुग्न सफल भयो । अर्थात सार्वजनिकको ९ घण्टा भित्रै ट्रेलरले ८ लाख २० हजारभन्दा बढी भ्युज प्राप्त गरेको थियो ।
यतिबेला हामिले यो समाचार तयार गर्दासम्म पनि ट्रेलर १५ लाख ५४ हजार बढी भ्युजका साथ युट्युबको ट्रेन्डिङको पहिलो स्थानमा विराजमान छ । जहाँ दर्शकबाट सकारात्मक प्रतिक्रिया समेत मिलिरहेको छ । ट्रेलरमा प्रेम र द्वन्द्वको कथालाई प्रभावशाली रूपमा प्रस्तुत गरिएको छ । जसमा पूजा शर्मा पत्रकारको भूमिकामा देखिएकी छन् भने पल शाहले दोहोरो भूमिका निभाएका छन् । हेर्नुस् ट्रेलर ।
ट्रेलरको अन्तिम दृश्यमा दुई पलबीचको रोचक द्वन्द्वले दर्शकलाई आकर्षित गरेको छ । सुदर्शन थापा प्रोडक्शन र पूजा शर्मा प्रोडक्शनको संयुक्त निर्माणमा बनेको यो फिल्मका निर्माता पूजा शर्मा नै हुन् । कार्यकारी निर्माताको जिम्मेवारी सुशन पाठकले लिएका छन् भने निर्देशन सुदर्शन थापाले गरेका छन् । चलचित्रमा पल शाह, पूजा शर्मा, प्रियंका कार्की, प्रमोद अग्रहरी, निकीता चण्डक, प्रकाश शाह लगायतका कलाकारहरूको अभिनय देख्न पाइनेछ ।
Discussion about this post