पाँच भिन्न अवतारसहित फिल्म एक्टरमा प्रदिप खड्का, सार्वजनीक भयो क्यारेक्टर लुक्स पोस्टर

इटहरी/ प्रदीप खड्का अभिनीत फिल्म ‘एक्टर: टेक वान’को फर्स्ट लुक पोस्टर हालै सार्वजनिक भएको छ । सार्वजनिक पोस्टरमा प्रदीप खड्का पाँच भिन्न अवतारमा देखिएका छन्, जसले दर्शकहरूको चासो र उत्सुकता बढाइदिएको छ । पोस्टरमा प्रदीपलाई घाइते अवस्थामा, नेपाली पोसाकमा, पाइलटको पोसाकमा, लामो कपालमा क्याजुल लुक्समा र स्वेटरमा जाडो मौसमको लुक्समा देखाइएको छ । यसमध्ये सबैभन्दा बढी ध्यान खिच्ने भनेको उनको चोटग्रस्त लुक्स हो । यस लुक्समा प्रदीपको टाउकोमा ब्यान्डेज बाँधिएको छ, हातमा प्लास्टर लगाइएको छ र उनी बैशाखीको सहारामा उभिएका छन् । यो लुक्सले प्रदीपको चरित्रलाई कुनै ठूलो दुर्घटना वा आक्रमणको शिकार भएको संकेत दिन्छ ।

यद्यपि, यी पाँच लुक्समध्ये कुन क्यारेक्टरले फिल्ममा प्रमुख भूमिका खेल्नेछ भन्ने कुरा खुलाइएको छैन । फिल्म आगामी कात्तिक १५ गते रिलिज हुँदैछ । प्रदीप खड्कासँगै फिल्ममा डेब्यु अभिनेत्री दिव्या रायमाझी प्रमुख भूमिकामा छिन् । राजन भुसालको निर्देशनमा बनेको यस फिल्ममा आना शर्मा, राजवल्लभ कोइराला, दिव्य देव, सुशील सिटौला, उषा रजक, सिर्जना अधिकारी, अनुज पाण्डे, बादल भट्ट, प्रदीप कुमार चौधरी (पीके), देवेन्द्र नेपाललगायतका कलाकारहरू पनि रहेका छन् । राजवल्लभ कोइरालाको यो कमब्याक फिल्म हो । फिल्मको निर्माता थमन कुमारी भण्डारी हुन् भने पोस्टरको डिजाइन रोयल भिमसेनले गरेका हुन् ।

अदृत फिल्मस् र मोती फिल्म्सको प्रस्तुति रहेको यस फिल्मको छायांकन नरेन्द्र मैनालीले गरेका छन् । फिल्मको लेखक आकाश बराल र राजन भुसाल हुन् । फिल्ममा शिशिर खाती र किरण थापाको कोरियोग्राफी, अष्टम महर्जनको द्वन्द्व निर्देशन, कृष्णमान तामाङको आर्ट डिरेक्सन, र हर्कुलस बस्नेत, रोहित शाक्य र एलिस कार्कीको संगीत रहेको छ । फिल्मका सह निर्देशक विशाल जंग, समय थपलिया, जीवन ढुंगेल, र सुमन कार्की हुन् । निमेश श्रेष्ठले फिल्मको सम्पादन गरेका छन् भने राजेन्द्र मुक्ताङले कलरको जिम्मा लिएका छन् । ‘एक्टर: टेक वान’को यो पोस्टरले फिल्मप्रतिको कौतुहलता अझै बढाइदिएको छ र प्रदीप खड्काको नयाँ अवतार हेर्न दर्शकहरू उत्साहित छन् ।