३ दिन लगाएर कोशी प्रदेशको ५ शहरमा सकियो ‘रावायण’ फिल्मको सिटी सफारी प्रचार

इटहरी/ ‘रावायण’ फिल्मको प्रचारप्रसार अभियान अन्तर्गत कोशी प्रदेशका पाँच प्रमुख शहरहरू इटहरी, विराटनगर, धरान, दमक, र बिर्तामोडमा तीन दिन लगाएर सिटी सफारी प्रचारको काम सम्पन्न भएको छ । यो अभियानको क्रममा हरेक शहरमा ५०/५० वटा सिटी सफारीमा फिल्मका पोस्टर टाँसिएका थिए । यसरी कुल २५० वटा सिटी सफारीमा ‘रावायण’ फिल्मको पोस्टर राखिएको छ । पोस्टर टाँस्नका साथै स्थानीय बासिन्दा र सफारी चालकहरूलाई फिल्मको टिजर देखाएर उनीहरूको प्रतिक्रिया पनि लीएको थियो । टिजर हेरिसकेपछि धेरैले फिल्मलाई मद्रासी शैलीको भन्दै प्रशंसा गरेका थिए ।

खासगरी, अभिनेता पल शाहको गेटअप र एक्सनका दृश्यले दर्शकहरूलाई निकै प्रभावित पारेको देखियो । स्थानीय बासिन्दाहरूको प्रतिक्रिया संकलन गर्दा अधिकांश स्थानहरूमा पल शाहका फ्यानहरू भेटिएका थिए, जसले फिल्मप्रतिको उत्साह झल्काउँछ । सिटि सफारीमा पोस्टर प्रचार निकै प्रभावकारी हुनेगर्छ । हरेक दिन दिनभर चोक चोकमा सफारी डुलिरहने हुदा फिल्मको प्रचारमा यसले निकै सहयोग पुर्याउने हुदा फिल्म युनिटको आकर्षण यस किसिमको प्रचारमा बढ्दो छ । अझ शो क्रममा टिजर तथा ट्रेलर देखाउदै प्रतिक्रिया लिने नया शैलीले फिल्म प्रति चासो बढ्ने देखिएको छ ।

‘रावायण’ फिल्म भदौ २१ गते प्रदर्शनमा आउने तयारीमा छ । सुदर्शन थापा प्रोडक्शन र पूजा शर्मा प्रोडक्शनको संयुक्त ब्यानरमा बनेको यस फिल्मकी निर्माता पूजा शर्मा हुन् भने कार्यकारी निर्माता सुशन पाठक रहेका छन् । फिल्ममा मुख्य कलाकारहरूमा पल शाह, पूजा शर्मा, प्रियंका कार्की, प्रमोद अग्रहरी, निकिता चण्डक, प्रकाश शाह, कैलाश रावल, अर्जुनजंग शाही, शर्मिला मल्ल, प्रदीप ढकाल, अनिल कुर्मी, रजिता पराजुली, निमा पाण्डे, विशाल पहारी, सुशान्तकुमार श्रेष्ठ, योगेश भण्डारी, प्रेरणा गिरी र सुहान श्रेष्ठ रहेका छन ।

फिल्मको कथा सुदर्शन थापाले लेखेका हुन् भने पटकथा शिवम अधिकारीले तयार पारेका छन् । प्रदीप श्रीवास्तव र राज गौरवले फिल्मको ओरिजिनल हिन्दी स्क्रिप्ट तयार पारेका हुन् । छायांकनको जिम्मा सौरभ लामाले लिएका छन् भने सम्पादन मिलन श्रेष्ठले गरेका छन् । साउण्ड डिजाइन प्रमोद श्रीनिवासनले गरेका छन् । फिल्ममा संगीत निरज सिंह र रेवन आरती सिंहको छ, जसमा नकासा अजिज, कुनाल गान्जावाला र सोनु कक्करले स्वर दिएका छन् । डा. कृष्णहरि बराल र प्रदीप श्रीवास्तवले गीत लेखेका छन् ।

फिल्मको ब्याकग्राउन्ड स्कोर रेवन आरती सिंहले तयार पारेका छन् भने आर्ट डिरेक्सन उमेश चौधरीले गरेका छन् । कोरियोग्राफी विक्रम स्वार र रामजी लामिछानेले गरेका छन् । एक्सन निर्देशन श्री श्रेष्ठको छ । फिल्मको भीएफएक्स समीर मियाँले गरेका छन् भने फिल्मको कलर राजेन्द्र मोक्तानले गरेका छन् । पोस्टर डिजाइन विजय बस्यालले गरेका हुन् भने प्रोडक्सन डिजाइन नविन पुरीले गरेका छन् । फिल्मको वितरण आरआर फिल्म्सले गर्नेछ । ‘रावायण’ फिल्ममा देखाइएको एक्सन, गेटअप र भिजुअल इफेक्ट्सको प्रभावले दर्शकहरूलाई आकर्षित गर्ने अपेक्षा गरिएको छ ।