‘तामाङ चलचित्र संघ’कोशी प्रदेश अध्यक्षमा भिम लामा, गरे पद तथा गोपनियताको सपथग्रहण

इटहरी/ कोशी प्रदेशमा चलचित्रकर्मीहरुको हक हितका लागी काम गर्ने हेतुले विभिन्न जातजाति अन्तर्गतको संघहरु खुलेका छन् । यसैक्रममा तामाङ समुदायका चलचित्रकर्मीहरुको हक हितमा काम गर्ने र सबै समुदायसंग सहकार्य गर्ने उद्देश्य सहित ‘तामाङ चलचित्र संघ’ कोशी प्रदेश शाखाको गठन भएको छ । गएको फागुनमै यो शाखा गठन भएपनी पुर्णता भने भर्खरै पाएको छ । शनिबार धरानमा अवस्थित नेपाल तामाङ घेदुङको भवनमा ‘शाखा विस्तार तथा सपथ ग्रहण’ कार्यक्रमको आयोजना गर्दै कोशी प्रदेश शाखाका अध्यक्ष भिम लामासहित संघका अन्य पदाधिकारीहरुले पद तथा गोपनियताको सपथ ग्रहण गरेका हुन् ।

सपथ ग्रहण कार्यक्रमको प्रमुख अतिथी तथा तामाङ चलचित्र संघको केन्द्रिय कार्यवाहक अध्यक्ष दिपक लामाले पदाधिकारीहरुलाई सपथ ग्रहण गराएका थिए । कोशी प्रदेश शाखाको अध्यक्ष भिम लामासंगै प्रथम उपाध्यक्ष अनुप योन्जन, दोश्रो उपाध्यक्ष मोहन लोप्चन, महासचिव शान्ती पाख्रीन, कोषाध्यक्ष स्मृति तामाङ, सदस्यहरु बुद्धिमान तामाङ, रामजी तामाङ, मंगलसिंह तामाङ, मानसिंह तामाङ र हस्त पाख्रीन गरि १० सदस्यीय समितीले पुर्णता पाएको हो ।

बाँकि रहेका केही सदस्यहरुलाई पहिलो बैठकबाट मनोनयन गरिने अध्यक्ष लामाले जानकारी गराए । कार्यक्रममा बोल्दै केन्द्रिय कार्यवाहक अध्यक्ष दिपकले केन्द्रले ७ ओटै प्रदेश र ७७ ओटै जिल्लासंगै पालिकाहरुमा समेत शाखा संजाल विस्तार गर्ने योजना रहेको सुनाउदै यहि अनुसार कोशी प्रदेशमा समेत कार्य अगाडि बढाउन प्रदेश समितिलाई आग्रह गरेका छन् । यस्तै प्रदेश शाखा अध्यक्षले पनि केन्द्रको निर्देशन अनुसार नै अबका कार्यक्रमहरु तय गरेर काम अगाडि बढाउने बताए ।

सपथ ग्रहण कार्यक्रममा नेपाल चलचित्रकर्मी महासंघ कोशी प्रदेश अध्यक्ष अरुण कुमार प्रधान, नेपाल तामाङ घेदुङ कोशी प्रदेश अध्यक्ष रेख बहादुर तामाङ, आदिवासी जनजाती चलचित्र महासंघ कोशी प्रदेश उपाध्यक्ष सुमन तामाङ लगायतको उपस्थिति रहेको थियो । उपस्थित विशिष्ट व्यक्तित्वहरुले नव निर्वाचित पदाधिकारीहरुलाई बधाई तथा शुभकामना व्यक्त गरेका थिए । एकल जातिय तथा समुदायको संघ भएपनी अन्य जाति तथा जातिय संघहरुसंगको सहकार्यमा काम गर्न उपस्थित चलचित्रकर्मीहरुले तामाङ चलचित्र संघका पदाधिकारीहरुलाई सुझाव दिएका छन् ।