विशिष्ट व्यक्तिहरूलाई सम्मानसहित भोलि विराटनगरमा फिल्म ‘चारदाम’को विशेष शो गरिने

इटहरी/ तामाङ रितिरिवाजमा निर्माण भएको फिल्म ‘चारदाम’ विराटनगरमा विशेष शो आयोजना गरिने भएको छ । यहि असार २२ गते विराटनगर अवस्थित सिटि सिनेमाको २ ओटै हलमा एकसाथ फिल्म चारदाम प्रदर्शन गर्ने तयारी पूरा भएको फिल्मका लेखक तथा निर्देशक लाखमान योन्जन तामाङले जानकारी गराए । उनका अनुसार विराटनगरको शो लाई नेपाल तामाङ घेदुङ महानगर समितिले आयोजना गर्दैछ ।

विराटनगरको शो संगै विभिन्न क्षेत्रमा योगदान पुर्याउने व्यक्तिहरुलाई सम्मानको कार्यक्रम पनि राखिएको छ । लाखमान योन्जन तामाङको लेखन तथा निर्देशनमा कोशी भिजन फिल्मस् प्रा.लिको ब्यानरमा निर्माण भएको फिल्मको यसअघि इटहरीमा २ पटक भब्य विशेष शो प्रदर्शन गरिएको थियो भने धरान, पोखरा, भोजपुर र चक्रघट्टि लगायतका ठाउँहरुमा पनि यो फिल्मको सफल रुपमा विशेष शो आयोजना गरिएको छ । यो फिल्मले हालै विराटनगरमा सम्पन्न ‘क्यानडा नेपाल माउन्टेन फिल्म फेस्टिभल’मा ‘बेस्ट सर्ट फिल्म’को अवार्ड हात पारेको थियो ।

मोहन लोप्चन तामाङको प्रस्तुतिमा तयार भएको फिल्मलाई मैना घिसिङ, मदन बहादुर राई, पूर्ण लिम्बू, वर्षा राजभण्डारी तामाङले संयुक्त निर्माण गरेका हुन् । भोजपुर र सुनसरीको विभिन्न स्थानमा छायाङ्कन गरिएको फिल्ममा सुकुमाया मोक्तान तामाङ, सुवास योन्जन तामाङ, मदन राई, शान्ति पाख्रिन, पूर्ण लिम्बू, मोहन लोप्चन, मेनुका राई, डम्बर कुमारी लिम्बू, कान्छा लामा, बाल कलाकार सुम्निमा तामाङ लगायत कलाकारहरूको अभिनय रहेको छ । यो चलचित्र चारदाममा सुमन तामाङको छायाङ्कन तथा हेमन तामाङको सम्पादन रहेको छ भने अशोक मण्डलको शृङ्गार रहेको छ ।