आदिवासी जनजाति चलचित्र प्रवर्द्धन गर्न समिती गठन भैसक्यो: संयोजक ज्योतिराज राई

इटहरी/ बुटवलमा शनिबार ‘मातृभाषी चलचित्रको निर्माण प्रवर्द्धन बजारीकरण’ विषयक अन्तर्कृयामा कार्यक्रम सम्पन्न भएको छ । नेपाल चलचित्र विकास बोर्ड अन्तर्गतको ‘आदिवासी जनजाती मातृभाषी चलचित्र प्रवर्द्धन समिति’ को आयोजना तथा आदिवासी जनजाती चलचित्र महासंघको आयोजना र मगर चलचित्रकर्मी संघ रुपन्देहीको सह-आयोजनामा सम्पन्न अन्तर्कृया कार्यक्रममा आदिवासी जनजातिका चलचित्र प्रवर्द्धनबारे बृहत् छलफल गरिएको छ ।

अन्तर्कृयामा बोल्दै ‘आदिवासी जनजाती मातृभाषी चलचित्र प्रवर्द्धन समिति’ का संयोजक ज्योतीराज राईले आदिवासी जनजाति चलचित्रको प्रवर्द्धन गर्नका लागी समिती गठन भैसकेको जानकारी गराए । उनले यो समितीका कारण आगामी दिनमा यस्ता चलचित्रको बजारीकरण गर्न सहज हुने बताए । यस्तै संयोजक राईले चलचित्र निर्माण अघि अध्यायन र अनुसन्धान हुन आवश्यक रहेको बताउदै अध्ययन र अनुसन्धान सहित निर्माण भएको चलचित्रको बजार प्रवर्द्धनमा सजिलो हुने धारणा व्यक्त गरे ।

संस्कृतिबारे नयाँपुस्तालाई ज्ञान प्रदान गर्ने माध्यम चलचित्र पनि भएको हुनाले आदिवासी जनजातिको भावनामा ठेस पुग्ने, उनीहरुको भाषा, कला, साहित्य र संस्कार संँस्कृतिमा आँच आउने कुरामा गम्भीर भएर ध्यान दिनुपर्ने संयोजक राईको भनाई छ ।

यता आदिवासी चलचित्रकर्मी महासंघका अध्यक्ष पुर्खाजीत राईले विश्व बजारमा आदीवासी जनजातिका भाषामा बनेका चलचित्रहरुलाई प्रवर्द्धन गर्दै पुर्याउने कार्य महासंघले गरेको जानकारी गराए । उनले आदीवासीहरु नेपालका मुलवासी भएकाले आफुहरुको भाषा नै नेपालको मुल भाषा भएको बताए । अन्तर्कृया कार्यक्रममा मातृभाषा र सामुदायिक मुद्दामा आधारित चलचित्र निर्माण, निर्देशन र प्रवर्द्धनमा विशेष योगदान पुर्याउने मेजन पुन मगर, धनबहादुर गुरुङ र छबिलाल(कोपिला) चौधरीलाई सम्मान समेत गरिएको थियो ।