टिमभित्रै लाग्यो बोक्सी ? ‘बोक्सीको घर’ले ५१ दिन मनाउदै गर्दा केकीप्रती असन्तुष्ट शुलक्षण

इटहरी/ नसोचेको सफलता फिल्म ‘बोक्सीको घर’ले पाएपछि यतिबेला यो फिल्मले ५१ दिन मनाउदै १० करोडको व्यापार गर्न सफल भएको छ । यता टिममा भने मनमुटाव सुरु भएको देखिन्छ । फिल्मका लेखक, निर्देशक तथा कलाकार शुलक्षण भारतीले चित्त दुखाएका छन् । सामाजिक संजाल फेसबुकमा एक लामो स्ट्याटस फिल्मकी अभिनेत्री तथा निर्माता केकि अधिकारी प्रती लक्षित गर्दै लेखेका छन् ।

उनले ‘यहाँ आफ्नो लागि आफैले बोल्नु पर्ने रहेछ र लड्नु पर्ने रहेछ ।’ भन्दै मेरा प्रश्नहरु कसैप्रती आक्षेप भने हैन भनेका छन् । तर, उनको स्ट्याटस पढ्दा सरासर अभिनेत्री तथा निर्माता केकि अधिकारी माथी नै हो भन्ने लाग्छ । उनले फिल्म प्रदर्शनको ५१ दिनमा आफुले गरेको अनुभवबाट उब्जिएको केही प्रश्नहरु “काम गर्ने कालू माम खाने आलु” के यो उखानले सार्थकता राख्छ ? भन्दै लेखेका छन् । यसको मतलब उनको कामको कदर नगरिएको भन्ने बुझिन्छ ।

यस्तै उनले बोक्सीको घरको कार्यक्रम भएको ठाँउमा लेखक र निर्देसकको उपस्थिती नहुनु र वास्ता नगरिएको गुनासो गर्दै नितान्त आफ्नो कृतीमाथि निर्माण पक्षले ध्यान नदिएकोमा पनि प्रश्न उब्जाएका छन् । यतिबेला फिल्मकि निर्माता तथा अभिनेत्री केकि अधिकारी नेपाल बाहिरका विभिन्न देशहरूमा फिल्म प्रदर्शनका लागी पुगेकी छन् । तर, लेखक तथा निर्देशकलाई भने लगिएको छैन । त्यसैले पनि उनको चित्त दुखाई रहेको बुझ्न सकिन्छ । आफू सर्जक भएर हेर्दा आफ्नो मृत्यु भएको अनुभव गरेको उनले लेखेका छन् । आर्थिक र सामाजिक रुपमा कमजोर छ भन्दैमा लेखक तथा निर्देशकलाई बेवास्ता गर्नु कत्तिको न्यायोचित होला भन्दै उचित मुल्यांकन नभएको धारणा व्यक्त गरेका छन् ।

यो फिल्म ‘बोक्सीको घर’कि अभिनेत्री तथा निर्माता केकि अधिकारीलाई लेखक तथा निर्देशकको यो स्ट्याटसबारे सोध्दा सटिक जवाफ दिँदै आफुलाई केही थाहा नभएको बताईन् । यता शुलक्षणले भने बौद्धिक चोरी भनेको के हो ? भन्दै प्रश्न समेत गरेका छन् । यो फिल्मको सफलतासंगै ‘बोक्सीको घर-२’ को पनि निर्माण घोषणा गरिएको थियो । अब यो फिल्मको दोश्रो शृङ्खला बन्नेमा शंका उब्जिएको छ । भारतिले प्रश्नमाथि प्रश्न गर्दै ‘अब फेरि जिवनमा म जस्ताले चलचित्र किन र के का लागि बनाउने ?’ भनेका छन् । यसकारण पनि ‘बोक्सीको घर-२’ बन्नेमा अन्यौलता छाएको भन्न सकिन्छ ।