इटहरी/ नेपालीहरुलाई चाडवाड लाग्दा उत्साह र उमंग थपिएको देखिन्छ भने चलचित्र क्षेत्रमा पनि सोही अवस्थाको सृजना हरेक वर्ष भैरहेको हुन्छ । यतिबेला दशैँ खाने ३ फिल्म देखिएको छ । ‘बलिदान’, ‘छक्का पन्जा-५’ र ‘बेहुली फ्रम मेघौली’ । यी ३ मध्ये ‘बलिदान’ भने यो मितिमा प्रदर्शन हुने छाँटकाट न्यून छ । कारण, ‘बलिदान’को छायांकन नै सुरु भएको छैन । यतिबेला कोशी प्रदेश अन्तर्गत सुनसरीको इटहरीमा इन्डोर स्टुडियो सेट डिजाईनको काम भैरहे संगै मोरङको बिराटनगर र कानेपोखरीमा २ छुट्टाछुट्टै सेट निर्माणको काम भैरहेको छ ।
फिल्म ‘बलिदान’को छायांकन सुरु हुन अझै १ महिना बढी लाग्ने देखिन्छ । फिल्मका प्रमुख अभिनेता समीर भट्ट यतिबेला अर्को फिल्म ‘१२ गाउँ’को छायांकनमा ब्यस्त छन् । त्यसैले पनि ‘बलिदान’ फिल्मको छायांकन तत्काल नहुने देखिन्छ । निर्माण युनिटसंग यसबारे कुरा गर्दा समेत समय अभावका कारण निर्धारित मितिमा प्रदर्शन गर्न नसकिने संकेत गरेका छन् । फिल्मको छायांकन सेड्युल नै ६० दिनको रहने बताईएको छ । यसर्थ पनि फिल्म निर्धारित मितिमा प्रदर्शन नहुने देखिन्छ । दिपक-दिपासंग नजुध्ने संकेत समेत निर्माता सन्तोष सेनले दिएका छन् । त्यसैले अब ‘बलिदान’ युनिटले २०८२ सालको दशैँ खाने दाउमा रहेको अड्कल गर्न सकिन्छ । जे होस्, जुध्नु हानिकारक छ । जुधाईको उदाहरणहरु देख्दै आईरहेका नै छौँ ।
यता ‘बलिदान’ नजुध्ने देखिएपनी ‘छक्का पन्जा-५’ संग जुध्न स्वस्तिमा खड्काको ‘बेहुली फ्रम मेघौली’ आएको छ । यो जुधाई कदापी राम्रो हैन । तर, छक्का पन्जा ५ ले दशैँको फुलपाती लक्षित गरेर असोज २४ गते मिति सार्वजनिक गर्दै छायांकन सुरु गरेको छ । यता छायांकन सम्पन्न भैसकेको ‘बेहुली फ्रम मेघौली’ ले भने दशैँ मात्रै भनेको छ, फिक्स मिति भने सार्वजनिक गरेको छैन । आश छ यी २ ब्राण्ड भ्यालु भएका फिल्म युनिटले आपसी समझदारीमा दुबैलाई व्यापारीक घाटा नहुने गरि केही साताको अन्तरमा प्रदर्शन गर्नेछन् ।
आमा सरस्वती मुभिज र आईएमीको प्रस्तुतीमा निर्माण हुने फिल्म ‘छक्का पन्जा ५’ दिपा श्री निरौलाले निर्देशन गर्दैछिन् भने सार्वजनिक फर्स्टलुक पोस्टरमा राजाको पहिचान बनाएका दिपकसंगै अभिनेत्री वर्षा सिवाकोटीलाई पनि फिचर्ड गरिएको छ । उनको गेटअपले रानीको संकेत गर्छ । ब्याकग्राउण्डमा राजखान्दानको जस्तो देखिने घरको बनावट अनि बर्षा बसेको कुर्सीले उनी यसपटक राजा दिपकको रानी बनेर देखिने अड्कल गर्न सकिन्छ । अर्थात दिपकले बर्षालाई बिहे गर्छन् । अब सत्य बुझ्नलाई त फिल्म प्रदर्शन पर्खनै पर्यो । यता सार्वजनिक पोस्टरमा दिपक र बर्षाको छेउमै उभिएर बडेमानको छाताले बर्षालाई फिल्मका अर्का पात्र माग्नेबुढाले ओढाईरहेका छन् । यो फिल्मको ४५ दिनको सेड्युल सहित काभ्रेको पाँचखाल क्षेत्र, पनौती, पोखरा छायांकन भैरहेको छ । फिल्ममा अन्य कलाकारहरूको बारेमा भने खुलाईएको छैन् ।
यस्तै दशैँ खाने दाउमै सार्वजनिक भएको ‘बेहुली फ्रम मेघौली’ को पोस्टरले पनि यतिबेला सामाजिक संजालमा राम्रै चर्चा बटुलिरहेको छ । सार्वजनिक पोस्टरमा अभिनेत्री स्वस्तिमा खड्काले ट्याक्टर कुदाउदै कसैलाई थर्काउदै पिछा गरेको जस्तो देखिन्छ । उनी बेहुली पहिरनमा छिन् । यो फिल्म निश्चल बस्नेत र स्वस्तिमा खड्काको होम प्रोडक्सन फिल्म हो । यो फिल्मका निर्मातामा स्वस्तिमा र निश्चल नै छन् भने शंकर पाण्डे र फिरोज खड्का कार्यकारी निर्माता हुन् । सजन काफ्ले र आकाश बरालको संयुक्त लेखन तथा निर्देशन रहेको फिल्म ‘बेहुली फ्रम मेघौली’मा निश्चल र स्वस्तिमासंगै विजय बराल, सिम्रन खड्का, लोकेन्द्र लेखक, रामबाबु रेग्मी, लुनिभा तुलाधर, सिरु खड्का, बसुन्धरा भुसाल, रक्षा थापालगायत कलाकारको पनि अभिनय छ । यो फिल्म ब्ल्याक हर्स पिक्चर र मेघौली फिल्मस्को प्रस्तुतिमा निर्माण भएको हो । कमेडी-सोसल जनरामा बनेको यो फिल्मबाट स्वस्तिमा खड्का निर्माताको रुपमा डेब्यु गर्दैछिन् ।
Discussion about this post