इटहरी/ आगामी असोज ३ गतेलाई प्रदर्शन मिति तय गरेको फिल्म ‘ह्रस्व दीर्घ’को यतिबेला चर्चा छ । प्रमुखत: यो फिल्मको चर्चा भारतको प्रख्यात रामोजी फिल्म सिटीमा खिचिने भएपछि चर्चा चलेको थियो भने दक्षिण भारतीय कलाकार तथा प्राविधिकहरु जोडिएपछी पनि यो फिल्मको चर्चा थप चुलिएको थियो । यतिबेला भने प्रचारप्रसारलाई तिब्रता दिंदै निर्माण युनिटले सार्वजनिक गरेको पोस्टरका कारण थप चर्चा सहित कौतुहलता थपिएको छ ।
रिलित मिति हेरफेर भएर असोज ३ लाई लक गरेपछि यतिबेला फिल्मको एक पोस्टर सार्वजनिक गरिएको छ । फिल्ममा मुख्य अभिनेत्रीको रुपमा रहेकी निता ढुङ्गानाको क्यारेकटर लुक्स सहितको पोस्टर सार्वजनिक गरिएको हो । सार्वजनिक पोस्टरमा निताको पुरै शरीर सहित उनको टाउकोमा अन्य कलाकारहरूको समेत टाउको जोडेर राखिएको छ । यस्तै उनले हातमा गधा अर्थात बज्र पनि बोकेकी छन् । जस्ले गर्दा उनी न त रावण न त हनुमान जस्तो देखिएको छ ।
पोस्टरले यो कन्फ्युजन ल्याउदा फिल्म प्रतिक्षित बन्न मद्दत पुग्छ । उनको टाउकोसंग दक्षिण भारतका चर्चित कलाकार ब्रमानन्दम र अलिसंगै नेपाली कलाकार किरण केसी, बुद्धि तामाङ, रवीन्द्र झा, आदर्श मिश्रको टाउको जोडिएको छ । चन्द्र पन्तको निर्देशन रहेको यो फिल्मलाई निता फिल्मसको ब्यानरमा निर्माण गरिएको हो । केही भोजपुरी फिल्म निर्देशन गरेका निर्देशक पन्तले यहि फिल्मबाट नेपाली फिल्ममा निर्देशकको रुपमा डेब्यु गर्दैछन् भने द्वन्द्व निर्देशकको रुपमा भने नेपाली सिनेमा क्षेत्रमा उनी कहलिएका छन् ।
‘ह्रस्व दीर्घ’को कथा हरिहर अधिकारीले लेखेका हुन् भने यो फिल्मको निर्माताको रुपमा स्वयं अभिनेत्री निता ढुंगाना नै रहेकी छन् । बलिउडकी शुष्मा सुमनको कोरियोग्राफी यो फिल्ममा रहेको छ भने भारतीय छायांकार कवीरलालले ‘ह्रस्व दीर्घ’लाई छायांकन गरेका हुन् । नेपाल र भारतमा छायांकन गरिएको फिल्ममा नीता ढुंगानासहित हरिहर अधिकारी, विपना थापा, गरिमा शर्मा, प्रशान्त ताम्राकार, सरोज खनाल, बुद्धि तामाङ, किरण केसी, रविन्द्र झासंगै भारतिय कलाकारहरू ब्रह्मानन्दम, अलि, प्रदीप रावत र कबीर दुहान सिंहको समेत मुख्य भूमिकामा अभिनय रहेको छ ।
Discussion about this post