काठमाडौ र विराटनगर प्रिमियरपछी कोशी प्रदेशको हल भिजिटमा ‘मनसरा’ युनिट

इटहरी/ आज बैशाख २१ गतेबाट सार्वजनिक प्रदर्शनमा आएको फिल्म ‘मनसरा’ युनिटले कोशी प्रदेशलाई प्रचारको लागी प्रमुख रुपमा लिएको छ । ललितपुरको लबिङ मलमा रहेको क्विएफएक्समा प्रिमियर पस्चात लगत्तै मनसरा युनिट कोशी प्रदेशको यात्रामा निस्कियो । विराटनगरमा ‘मनसरा’ को दोश्रो पटक भब्य प्रिमियर गरियो । प्रिमियरमा फिल्मका प्रमुख कलाकारहरूको समेत उपस्थिति रहेको थियो ।

विहिबार २० गते विराटनगरको क्विएफएक्समा गरिएको प्रिमियरबाट फिल्मले सकारात्मक प्रतिक्रिया पाएको छ । प्रिमियर लगत्तै आज २१ गतेबाट प्रदर्शनसंगै युनिट कोशी प्रदेशका मुख्य मुख्य सहरमा रहेको सिनेमा घरहरुमा दर्शक भेट्ने सेड्युलमा छ । बिराटनगरसंगै इटहरी, धरान दमक र विर्तामोडका दर्शक भेट्न मनसरा युनिटले आज र भोलि २२ गते समय छुट्याएको छ ।

इटहरीमा इलाईट सिनेमा हल र क्विएफएक्समा दर्शक भेट्न ११ बजेदेखी आउने बताईएको छ भने त्यसपछि युनिट धरान लाग्नेछ । धरानमा रहेको फ्रेन्ड्स सिनेमामा युनिट दर्शक भेट्न ३:४५ बजे पुग्नेछ । त्यसपछि शनिबार २२ गते दर्शकलाई भेट्न फिल्म युनिट प्रमुख कलाकारहरू सहित दमक र विर्तामोड लाग्नेछ । यसअघि पनि मनसरा टिमले प्रचारप्रसारको रुपमा ‘कविता कन्सर्ट’ कार्यक्रम सहित देश दौडाहामा निस्किएको थियो । सो बेला पनि युनिटले कोशी प्रदेशलाई नै प्रमुख गन्तव्य मानेको थियो । अर्थात पोखरा र बुटवलपछि कोशी प्रदेशको बिर्तामोड, उर्लाबारी, दमक, बेलाबारी, धरान र इटहरीमा ‘कविता कन्सर्ट’ कार्यक्रमको आयोजना गरिएको थियो ।

फिल्ममा दयाहाङ राई, मिरुना मगर, प्रविण खतिवडा, मेनुका प्रधान, हेमन्त बुढाथोकी, शान्ति गिरी, नेनहान राईलगायतको अभिनय रहेको छ । निर्देशक उपेन्द्र सुब्बाकै लेखन रहेको मनसराका निर्माता शैलेन्द्र ध्वज कार्की हुन् । विष्णु कुमार लिम्बु, मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ यसका सह–निर्माता हुन् । यो फिल्ममा निमेश श्रेष्ठको सम्पादन, अर्जुन कार्कीको रंग संयोजन, श्रवल राज पाण्डेको साउन्ड डिजाइन, शैलेन्द्र डी कार्कीको डिओपी रहेको छ । सिजन दाहाल यसका कार्यकारी निर्माता हुन् भने फिल्मले नि:सन्तान पुरुषका कारण आइपर्ने आरोहअवरोहलाई प्रस्तुत गरिएको छ ।