पहिलो सिजन नसकिदै ‘र्याप स्टार’ दोश्रो सिजन घोषणा

इटहरी/ नेपालमा रियालिटी शोको बिगबिगी छ । स्तरिय र आकर्षक स्टुडियो सेट निर्माण गरेर रियालिटी शो भित्र प्रतिष्पर्धीहरु बिचको प्रतिष्पर्धा झै शो निर्माताहरु भित्रै पनि कस्ले राम्रो गर्ने भन्ने प्रतिष्पर्धा बढ्दो छ । अन्तर्राष्ट्रिय फ्रेन्चाइजदेखी मौलिक रियालिटी शोहरु नेपाली टेलिभिजनमा घन्किरहेका हुन्छन् । यस्तैमा युवापुस्ता माझ लोकप्रिय र्याप संगीत पारखीहरु बिचको प्रतिष्पर्धा ‘र्याप स्टार’ चलिरहेको छ । यतिबेला उक्त शो फाईनलको चरणमा छ भने पहिलो सिजन सम्पन्न हुन नपाउदै यो रियालिटी शोको दोश्रो सिजन घोषणा गरिएको छ ।

‘र्याप स्टार’को आयोजक संस्था ग्रीन मन्की फिल्मस् प्रालीले र्याप विधामा युवापुस्ताको आकर्षण निकै रहेकोले तुरुन्त नयाँ सिजन ल्याउन लागेको जनाएको छ । आयोजकका अनुसार दोश्रो सिजनमा र्याप स्टार प्रसारण हुने टेलिभिजन, युट्युब च्यानल र वालेट पार्टनर परिवर्तन हुने पनि जनाएको छ । पहिलो सिजन स्पेस फोरके टेलिभिजनमा प्रसारण भैरहेको छ भने दोश्रो सिजन ग्यालेक्सी फोरके टेलिभिजनमा प्रसारण हुनेछ । यस्तै युट्युबमा भने ‘जिएम डिजिटल’ नामक युट्युब च्यानलबाट ‘र्याप स्टार’ को दोश्रो सिजन सार्वजनिक हुनेछ ।

हाल पहिलो सिजन भने ओएसआर रियालिटीबाट सार्वजनिक भैरहेको छ । यता वालेट पार्टनर ओएसआर कनेक्ट रहेकोमा दोश्रो संस्करणमा भने ‘माइ पे’ रहने जानकारी दिइएको छ । यो संगै आयोजकले अर्को हाँस्यव्यङ्ग्य प्रतिस्पर्धात्मक कार्यक्रम ‘को बन्छ महागफाडि’ ल्याउने पनि घोषणा गरेको छ । कमेडिका कार्यक्रमहरु पनि नेपाली दर्शकले रुचाईरहेको अवस्थामा आयोजक संस्था ग्रीन मन्कीले यो शोको घोषणा गरेको हो । देश तथा देश बाहिर रहेका कमेडी पारखीहरुले यो शोमा सहभागी हुन सक्ने बताईएको छ भने चाडैं डिजिटल अडिसन खुलाइने भएको छ ।