इटहरी/ कोशी प्रदेशमा प्रथम ऐतिहासिक ‘प्रादेशिक ललितकला प्रदर्शनी-२०८०’ आयोजना हुने भएको छ । इटहरी उपमहानगरपालिकाको वडा न. ४ स्थित कृति, प्रकृति र संस्कृतिको केन्द्र बन्दै गएको रमणीय इटहरी मेट्रिक्समा हुने कार्यक्रम नेपाल ललितकला प्रज्ञा प्रतिष्ठान, काठमाडौंको आयोजना रहनेछ । आयोजना स्थल मेट्रिक्समै शुक्रवार पत्रकार भेटघाटको कार्यक्रम गर्दै फागुन २९ गतेदेखि चैत्र ३ गतेसम्म ओेैपचारिक रुपमा यो प्रदर्शनी आयोजना हुने बताईयो ।
यस्तै कला प्रदर्शनी अवलोकन नसकिएमा चैत्र ९ गतेसम्म लम्ब्याउन सकिने प्रदर्शनीका सह-संयोजक तथा वरिष्ठ चित्रकार, मुर्तिकार विक्रम श्रीले पत्रकार भेटघाटमा बताए । कोशी प्रदेशलगायत सातै प्रदेशमा हुने कार्यक्रममा इटहरी उपमहानगरपालिकाले सहकार्य गरेको छ भने इटहरी मेट्रिक्सको स्थानिय ब्यवस्थापन रहने छ । प्रतिष्ठानले पहिलो पटक कोशी प्रदेशलगायत सातै प्रदेशमा प्रादेशिक ललितकला प्रदर्शनी-२०८० को आयोजना गर्ने आट गरेको छ । जसले कम्तीमा कलाको क्षेत्रमा भए पनि पुरानो केन्द्रीकृत राज्यको राजधानीवादलाई तोडेर मोफसललाई समेटेको अनुभूति दिने सह-संयोजक श्रीको ठम्याई छ ।
प्रदर्शनीमा ललितकला अन्तर्गत चित्रकला, मूर्तिकला, लोककला, हस्तकला, वस्तुकलाका साथै अन्य सृजनात्मक कलाका विधासम्बन्धित कलाकृतिहरुलाई प्रदर्शन गरिनेछ । प्रतिष्ठानले चिन्हित गरेका ललितकलाका बिधाहरुअन्तर्गत चित्रकला, मुर्तिकला, लोककला, हस्तकलाका अलावा वास्तुकला तथा अन्य सिर्जनात्मक कलातर्फ सिर्जनात्मक छविकला, भिडियो आर्ट, प्रतिस्थापन कला, भावभङ्गिमा कला, कार्टून, क्यारिकेचर, पोष्टर र डिजिटल कलासमेत प्रदर्शनीमा समावेश गरिने छन् । प्रतिष्ठानले टाटुलाई पनि कलाको मान्यता दिने बताएको छ ।
प्रदर्शनीमा समावेश वा सहभागी गरिएका कलाकृतिहरुमध्येबाट प्रतिष्ठानबाट प्रदत्त नियम, आकार र मापदण्डका आधारमा निश्चित कलाकृतिहरुलाई विज्ञहरुको टोलीबाट छनौट गरी प्रतियोगितासमेत गराइने बताईएको छ । सातै प्रदेशहरुमा आयोजित प्रादेशिक ललितकला प्रदर्शनीबाट बिजयी प्रतियोगी कलाकृतिहरुलाई सिफारिस सहित राष्ट्रिय ललितकला प्रदर्शनीमा समावेश गरिने छ । राष्ट्रिय ललितकला प्रदर्शनीमा समावेश कलाकृतिहरुलाई ‘सर्वोत्कृष्ट राष्ट्रिय ललितकला पुरस्कार’, ‘ललितकला विधागत पुरस्कार’ र ‘उत्कृष्ट विद्यार्थी ललितकला पुरस्कार’ प्रदान गरिने छ ।
ललितकला प्रदर्शनीमा हालसम्म १ सय ४७ जनाले सहाभागिता फारम भरिसकेका छन् । जसमा ५८ जना चित्रकारका १२१ चित्रकला, ३६ जना मूर्तिकारका ४१ मूर्तिकला, २५ ओटा लोककला, १५ वटा वास्तुकला, १२ ओटा फोटोग्राफी छविचित्र, २ ओटा भिडियो आर्ट, २ ओटा पर्फमिङ आर्ट र ५ ओटा प्रतिस्थापन कला रहेका छन् । हाल प्रदर्शनीका लागि स्थानीय व्यवस्थापनको जिम्मेवारी पाएको इटहरी मेट्रिक्सले आफ्नै पहलमा आयोजना स्थलको सौन्दयीकरण गर्ने र कलाकृतिहरुको डिस्प्ले गर्ने तयारी जोडतोडका साथ गरिरहेको छ भने आयोजनासम्बन्धी अन्य व्यवस्थापनका लागि इटहरी उपमहानगरपालिका र ललितकला प्रतिष्ठानले आर्थिक संयोजन गर्ने कार्य गरिरहेको छ । यसमा इटहरी उपमहानगरपालिकाले ललितकला प्रदर्शनीको लागि चासो र अग्रसरता लिएकोमा साँच्चै तारिफयोग्य रहेको सह-संयोजक श्री बताउछन् ।
प्रादेशिक ललितकला प्रदर्शनी-२०८० मा आएको सहभागी कलाकृक्तिहरु र कलाकारहरुको उत्साहजनक सहभागीता रहेको छ । अन्य प्रदेशमा भएको प्रदर्शनीमा भन्दा यो सहभागीता हलसम्मकै धेरै रहेको आयोजक संस्थाको ठम्याई छ । यस ऐतिहासिक ललितकला प्रदर्शनीले कोशी प्रदेशलाई देशको कलाक्षेत्रमा उर्वरभूमिको रुपमा उभ्याउने विश्वास लिईएको र प्रतिष्ठानको एक सर्वेअनुसार बागमती प्रदेशपछि कोशी प्रदेश नै ललितकलाको लागि अग्रणी प्रदेश रहेको कोशी प्रदेश समन्वयन समितिका संयोजक तथा समसामयिक चित्रकला विभाग प्रमुख प्राज्ञ संजय बान्तावाले बताए ।
Discussion about this post