‘मिसेस पुर्बेली आइकन’कि मिना दिनदुखी महिलाको सहयोगमा लागीपर्ने

इटहरी/ इटहरीमा ओपन स्पेस प्रालीको आयोजनामा कोशी प्रदेश स्तरिय पहिलो ‘मिसेस पुर्बेली आइकन-२०२४’ सौन्दर्य प्रतियोगिता सम्पन्न हुँदैछ । यो प्रतियोगिता विवाहित महिलाहरूको लागि मात्र नभएर उनीहरूको व्यक्तित्व विकास, आत्मविश्वास अभिवृद्धि र महिला सशक्तीकरणमा महत्वपूर्ण भूमिका खेल्नका लागि आयोजना गरिएको हो । यस प्रतियोगितामा ८ जना प्रतिस्पर्धीहरू सहभागी भएका छन्, जसमा मीन कुमारी बजगाईं पनि एक हुन् ।

बाल्यकाल:
मीन कुमारी बजगाईंको जन्म दमक-१, झापामा भएको हो। उनका पिताको नाम टंक प्रसाद बजगाईं र आमाको नाम भघिरथा बजगाईं हो। उनी बाल्यकालदेखि नै चन्चले स्वभावकी, पढाइमा अब्बल र नृत्यमा रुचि राख्ने थिइन्। उनले सानैदेखि नर्स बन्ने सपना देखेकी थिइन्।

किशोरावस्था:
किशोरावस्थामा मीनको मुख्य लक्ष्य मोडेल र एक्टर बन्ने थियो। यद्यपि यो सपना पूर्णरूपमा पूरा नभए पनि, अहिले मिसेस पुर्बेली आइकन प्रतियोगितामा सहभागी हुँदै उनले आफ्नो कलात्मक पक्षलाई अझै अघि बढाएकी छिन्। उनले स्नातकोत्तर तहको अध्ययन पूरा गरेर विवाह गरेकी हुन्। अहिले उनी शिक्षण पेशामा निरन्तर क्रियाशील छिन् । उनी १६ वर्षको उमेरदेखि नै यो पेशामा संलग्न भएकि हुन् ।

वैवाहिक जीवन:
मीन कुमारीको विवाह २०६६ साल फागुन ३ गते युवराज घिमिरेसँग मागी विवाहका रूपमा सम्पन्न भएको हो । विवाहपछि उनले पारिवारिक समर्थन खासै नपाए पनि, माइती पक्षबाट भने राम्रो सहयोग पाएकी छन् । यो प्रतियोगितामा भाग लिएपछि उनको आत्मविश्वासमा उल्लेखनीय वृद्धि भएको बताएकी छन् । परिवार, साथीभाई र माइतीहरूबाट उनलाई सकारात्मक प्रतिक्रिया र हौसला मिलिरहेको छ ।

भविष्यको सोच:
प्रतियोगितामा जितेपनि नजितेपनि मीन कुमारी बजगाईंले सामाजिक उत्तरदायित्वलाई ध्यानमा राख्दै दिनदुखी महिला दिदीबहिनीहरूको सहयोग गर्ने योजना बनाएकी छिन्। यदि यो कार्यक्रम जितेमा नारीहरूको हक हितको लागि सक्रिय भएर काम गर्ने र पिछडिएका महिलाहरूलाई प्रोत्साहन दिने कार्यक्रमहरूमा सहभागी हुने सोच राखेकी छिन् ।