दयाहाङ बिनै ‘मनसरा’को छायांकन सुरु, पहिलो दिन मिरुना र प्रवीणको दृष्य कैद

इटहरी/ दयाहाङ राई र मिरुना मगरको प्रमुख भुमिका रहने फिल्म ‘मनसरा’को छायांकन सुरु भएको छ । केही समयअघि अभिनेत्री मिरुना मगरलाई फिचर्ड गर्दै यो फिल्मको पोस्टर र प्रदर्शन मिति सार्वजनिक गरिएको थियो । सोमबार ललितपुरको नक्खुबाट यो फिल्मको छायांकन सुरु भएको हो । सामाजिक कथामा निर्माण हुने फिल्मको छायांकनको पहिलो दिन मिरुना र प्रवीण खतिवडाको दृष्य कैद गरिएको थियो ।

यो फिल्ममा दयाहाङ राई र मिरुना मगर प्रमुख भुमिकामा रहेपनी पहिलो दिनको छायांकनमा दयाहाङ सुटिङ स्थलमा थिएनन् । दया यतिबेला ‘डिग्री माईला’ छायांकनको लागी रुम्जाटारमा छन् । डिग्री माईलाको दोश्रो सेड्युल अन्तर्गत यतिबेला रुम्जाटारमा छायांकन भैरहेको छ । त्यसपस्चात दयाले ‘मनसरा’मा समय दिनेछन् ।

आगामी २०८१ सालको वैशाख २१ गते रिलिज हुने मनसरामा उपेन्द्र सुब्बाको लेखन तथा निर्देशन रहेको छ । फिल्मलाई शैलेन्द्र डि कार्कीले छायांकन गरिरहेका छन् । यो फिल्म मनसरामा मेनुका प्रधान र हेमन्त बुढाथोकीको समेत प्रमुख भुमिकामा अभिनय रहने छ । यो फिल्मका निर्माता छायाँकार शैलेन्द्र ध्वज कार्की नै हुन् भने कार्यकारी निर्माता सिजन दाहाल हुन् । कबड्डि फिल्मसको प्रस्तुतीमा निर्माण हुने फिल्ममा निमेश श्रेष्ठको सम्पादन रहनेछ ।