चकलेटि ३ हिरोहरु एकसाथ देखिने ‘पुजार सार्की’ फिल्मको वर्कसप सुरु

इटहरी/ निर्देशक दिनेश राउतले निर्देशन गर्ने नयाँ फिल्म ‘पुजार सार्की’ को घोषणा भएदेखी नै चर्चामा छ । अझै चकलेटी ३ हिरो आर्यन सिग्देल, प्रदिप खड्का र पल शाह अनुबन्ध भएपछि त फिल्मले थप चर्चा पाईरहेको छ । यो फिल्ममा अभिनेत्री अन्जना बराइली र प्रतिक्षा लिम्बु पनि अनुबन्ध भएकी छन् भने यतिबेला फिल्मको प्री-प्रोडक्सन अन्तर्गत वर्कसप समेत सुरु भएको छ ।
निर्माण टिमका तर्फबाट निर्देशक राउतले सामाजिक संजालमा वर्कसपको तस्बिर एकपछि अर्को गर्दै सार्वजनिक गरिरहेका छन् । यस्लाइ पनि एक प्रकारले फिल्मको प्रचारप्रसार नै भन्न सकिन्छ । राउतद्वारा सार्वजनिक २ तस्वीरमा फिल्मका अभिनेता तथा अभिनेत्रीहरुले स्कृप्ट पढिरहेको र त्यसमा छलफल गरिरहेको देख्न सकिन्छ ।

अभिनेत्री अन्जनाले फिल्म ‘महापुरूष’ बाट फिल्मी अभिनेत्रीको रुपमा अभिनय गरेकी थिइन् भने प्रतिक्षाले ‘जारी’ र ‘छक्का पन्जा ४’ मा अभिनय गरेकी छिन् । फिल्म माघको पहिलो साताबाट छायांकनमा जाने तयारी भइरहेको छ । पुजार सार्कीमा विकास सुवेदीको लेखन रहेको छ भने यो फिल्मको सुभाष भुसाल निर्माता हुन् । दिनेश र विकासले यसअघि फिल्म ‘प्रकाश’ मा सहकार्य गरेका थिए । यो संगै निर्देशक राउत ‘गाउँ नै रमाईलो’ नामक फिल्मको तयारीमा समेत जुटिरहेका छन् ।