ज्योती मगरमाथी भद्दा मजाक नगर्न गायिका एलिना चौहानको आग्रह

इटहरी/ केही दिनअघि गायिका ज्योती मगरले स्टेजमा प्रस्तुति दिँदै गर्दा जोशका साथ उफ्रिदैँ गर्दा स्टेज भ्वाङ परेर लडेको भिडियो सोमबार सामाजिक संजालमा भाइरल भयो । जस्ले मिडियामा पनि स्थान पायो । यता संजाल प्रयोगकर्ताहरुले ज्योतिलाई मजाक बनाए र ट्रोलको पात्र बनाए । त्यसैपनी ट्रोलको सिकार भैरहने ज्योतिको यो घटनाले त झन ट्रोलरहरुलाई ठुलै खजना भयो । यता गायिका एलिना चौहानले ज्योतिको समर्थन गर्दै सामाजिक संजालमा एक स्ट्याट्स पोस्ट गरेकी छन् ।

सोमबार राती उनले लेखेको स्ट्याटसमा यो दुखद घटनामा भद्दा मजाक नगर्न आग्रह गरेकी छन् । एलिनाले ‘संदर्भ ज्योति दिदि’ भन्दै सुरु गरेको सट्याटसमा यस्तो लेखेकी छन् ‘आफ्नै ब्यस्तताको कारणले थोरै ढिलो भए तरपनि । कुरा गएको साताको रहेछ । मैलेपनि भरखरै भिडियो भाईरल भएपछि थाहा पाए । इलामको माइ नगरपालिकामा आयोजित १३ कुने सिमसार महोत्सवमा ज्योति दिदिले आफ्नो प्रस्तुति दिँदै गर्दा स्टेजमा केहि कमजोरी देखियो र दिदि अस्थिर भएर स्टेजमै लड्नुभएछ, अत्यन्तै दुःख लाग्यो ।’

आफ्नै पनी कार्यक्रममा प्रस्तुति दिदै गर्दा दर्शकलाई आफुप्रती आकर्षण गर्न पर्ने कठिनाई र दुखलाई स्मरण गर्दै एलिनाले ‘म एक कलाकार भएको हिसाबले कार्यक्रममा आफु अघिका दर्शकलाई रुझाउन अनि उहाँहरुको ध्यान आफु प्रति खिच्न कति कठिन छ त्यो मैले मजले महशुस गर्न सक्छु । उक्त भिडियोलाई लिएर कति मानिसले भद्दा मजाक गरेको पाए, त्यो धेरै गलत हो । कृपया त्यसो नगरिदिनुहोला ।’ भनेकी छन् ।

उनले थप लेख्दै ‘सबैलाई ज्योति दिदिको आवाज, प्रस्तुति र ज्योति दिदिनैपनि मन नपर्न सक्छ तर त्यो दुर्धटना थियो, यसलाई मजाकको हिस्सा बनाउनु गलत हो । सबैले मलाईपनि मन पराउनु हुन्न, हो सबैको आ-आफ्नो संगीत र अभिनयको स्वाद फरक हुन सक्छ त्यसो भन्दैमा ज्योति दिदिलाई मन पराउने दर्शक श्रोताकोपनि कमि छैन । यस्ता दुर्घटना नहोस भनि सम्पूर्ण कार्यक्रम आयोजकहरुलाई यी कुराहरुमा अत्यन्तै गम्भिर भई ध्यान पुराउनुहुन म बिनम्र अनुरोध गर्दछु । शुभ रात्री ।’ भनेर लेखेकी छन् । उनको सो पोस्टको कमेन्टमा मिश्रित कमेन्टहरु आएका छन् ।

ज्योतिले यसअघि पनि सयौं स्टेजमा यस्तै जोसिलो प्रस्तुति दिइसकेकी छन् । तर, यो प्रकृतीको घटना भने उनिमाथी पहिलो हो । ज्योति मगर भन्ने बित्तिकै प्रस्तुती र उनको पहिरनले उपस्थित दर्शक तताउने भन्ने चलनचल्ती छ । यथार्थ हो पनि, उनका केही गीतहरु सुपरहिट छन् । त्यो संगै उनको नाम र उनले लगाउने पहिरन पनि । र उनलाई कार्यक्रममा बोलाउदा त्यही गीतको संगीतको सुरमा केटाहरु लट्ठै पार्ने पहिरनमा केही डबलअर्थी कुराहरु सहित दर्शकलाई उफार्दै आफू पनि बुरुक बुरुक उफ्रिन्छिन् । तर, पछिल्लो उफ्राईले भने दुखद घटना भयो । इलामको माई नगरपालिका १ अवस्थित बिहिबारेमा आयोजना भएको ‘१३ कुने सिमसार महोत्सवमा यहि पौष २० गते प्रस्तुतीको क्रमम भएको यो घटनाले उनको देब्रे खुट्टामा चोट समेत लागेको थियो ।