नेपालमा टिकटक ब्याण्ड हुनेभएपछी के भन्छन् सेलेब्रेटीहरु ?

इटहरी/ यतिबेला हिन्दुहरुको दोश्रो महान पर्व तिहारको माहौल छ । तर, यो तिहारलाई पनि ओझेल पार्ने गरि टिकटकको माहौल देखिएको छ । नेपाल सरकारले टिकटक ब्याण्ड गर्ने खबर सोमबार सार्वजनिक गरेपछी सामाजिक संजालमा तरङ्ग पैदा भएको छ । यो कुरापछी २ पाटोमा प्रतिक्रियाहरु सार्वजनिक भैरहेका छन् । कसैले ब्याण्ड हुनु राम्रो भनेका छन् भने कसैले राम्ररी टिकटक प्रयोग गरेर व्यवसायको प्रचार र आम्दानी गरिरहनेहरुको लागी सरकारले अंकुश लगाएको भनेर आलोचना गरिरहेका छन् ।

यता सिनेकर्मी तथा कलाकर्मीहरुले पनि आफ्नो आफ्नो अभिव्यक्तिहरु सामाजिक संजालहरुबाट दिइरहेका छन् । हाल प्रदर्शन भैरहेको फिल्म ‘दिमाग खराब’का निर्देशक निस्चल बस्नेत र अभिनेत्री स्वस्तिमा खड्काले टिकटकमै एक भिडियो लास्ट टिकटक भन्दै पोस्ट गरेका छन् । जहाँ यी २ ले सञ्चार तथा सुचना प्रविधि मन्त्री रेखा शर्माले टिकटक ब्याण्ड गर्न लागेको भन्ने बारे भिडियो हेर्दै फिल्म दिमाग खराबको प्रचार गरे । फिल्मले दर्शकको राम्रो साथ पाईरहेको कारण सो अन्तिम टिकटक भिडियोमा सबैलाई धन्यवाद समेत दिए । भेरिफाइड समेत भएको स्वस्तिमाको टिकटक आईडीबाट सो भिडियो पोस्ट गरिएको छ । स्वस्तिमाको टिकटकमा २ लाख ४१ हजार बढी फलोअर्स छन् ।

यस्तै अभिनेता, फिल्म निर्माता तथा सिनेमा हल व्यवसायी दिपक राज गिरिले पनि आफ्नो टिकटक एकाउन्टबाट एक भिडियो पोस्ट गरेका छन् । उनले भिडियोमा बोल्दै ‘बन्द भयो भन्य, बन्द हो कि हैन यसो चेक गर्न मात्रै खोज्या थे मैले खासमा’ भनेका छन् । उनले सरकारललाई व्यंग्य गर्दै ‘राज्यले गरेको निर्णय प्राय: लागू हुँदैन, भा पनि छैन । भैहाल्यो कि भन्ने कन्फ्युजले यसो चेक गर्दै अनि फेरि चलिरारैछ भनेर यो टिकटकको सास चेक गर्न मात्रै आको म” भनेका छन् । उनले सबैलाई तिहारको शुभकामना पनि त्यही भिडियोबाट दिए । दिपकको अफिसियल टिकटक एकाउन्टमा २ लाख ४१ हजार बढी फलोअर्स छन् ।

यता हास्य अभिनेता केदार प्रसाद घिमिरेले पनि ठट्यौली पारामा टिकटक ब्याण्ड हुने कुराको बारेमा आफ्नो प्रतिक्रिया राखेका छन् । उनले सामाजिक संजाल फेसबुकमा “समय क्रमसँगै टिकटक, पिकपक, जिकजक केके आउलान् तिनलाई कानुनको दायरामा ल्याउने हो, बन्द नै गर्ने होइन होला” भन्दै लेखेका छन् । उनले पनि सरकारले गरेको यो निर्णय प्रती व्यंग्य गर्दै “नत्र त करेन्ट लागेर मान्छे मर्यो भनेर बिध्युत प्राधिकरण नै बन्द गर्नुपर्ने हुन्छ ।” भनेका छन् । केदारको पनि टिकटक एकाउन्ट छ । जसमा ३ लाख ८७ हजारबढि फलोअर्स छन् ।

त्यसैगरी कार्यक्रम प्रस्तोतासमेत रहेका फिल्म निर्माता, निर्देशक तथा कलाकार आसिफ शाहले पनि यो विषयमा आफ्नो धारणा सामाजिक संजाल फेसबुकमा राखेका छन् । उनले टिकटक बन्द गर्ने निर्णय गलत छ भन्दै “हाम्रो सरकारले जहिले पनि निर्णय लिने मामलामा फितलो प्रदशन गर्छ र तिब्र आलोचना आईसके पछि सच्चिन्छ। सामाजिक सञ्जालको दुरुपयोग भएको होला तर त्यसको बिकल्प social media platform नै बन्द गरिनु कदापि होईन। यो निर्णय निक्कै बचकाना छ, र यदि “निर्णय फिर्ता” भन्ने खबर सुन्नमा आएमा सरकारको इज्जतको झनै कबाडा हुने निश्चित छ।” भनेर लेखेका छन् । उनको अफिसियल टिकटक एकाउन्टमा ५७ हजारबढी फलोअर्स छन् ।

यता गायिका मेलिना मैनालीले पनि सरकारले ब्याण्ड गर्ने भनेको टिकटकमै एक भिडोयो पोस्ट गरेकी छन् । जहाँ उनले यस्तो भनेकी छन् “म चाहिँ भएभरको टिकटक ड्राफ्टहरु सब हाल्दिन्छु । अब ब्यान्ड भएपनी होस, मलाई त एकदम खुशी लागिराछ । किन कि मान्छेहरूले टिकटक धेरै हेरेर युट्युब हेर्न छोडिहाले । अब हाम्रो नयाँ नयाँ गीतहरु युट्युबमा हेर्दैन मान्छेहरुले । अब टिकटक ब्यान्ड भयो भनेचाहिँ युट्युब हेर्नुहुन्छ सबैजनाले । नया नया गीतहरु सुन्न पाउनुहुन्छ युट्युबमा । टिकटकमा थोरै क्लिप मात्रै सुनेर भाइरल हुँदैन, फुल भिडियो हेरेर मात्रै गीत राम्रो संग चल्छ” । मेलिनाको अफिसियल टिकटकलाई फलो गर्नेहरुको संख्या १ लाख ९६ हजारभन्दा बढी रहेको छ ।