एकपछि अर्को फिल्ममा दयाहाङ र मिरुनाको जोडि, ‘लोकल हिरो’मा पनि अनुबन्ध

इटहरी/अभिनेता दयाहाङ राई र अभिनेत्री मिरुना मगरको मुख्य भुमिका रहने सिनेमा ‘लोकल हिरो’को निर्माण घोषणा गरिएको छ । अनन्या फिल्म्सले ‘सम्बोधन’ र ‘ग्याङस्टर ब्लुज’पछि तेस्रो सिनेमाको रुपमा ‘लोकल हिरो’ निर्माण हुने भएको हो । निर्माता सरोज न्यौपानेले सिनेमा आगामी फागुन २५ गते रिलिज हुने बताए । रोमान्टिक कमेडी तथा सोसल ड्रामा जनरामा निर्माण हुने सिनेमालाई विश्वास तिमल्सिना र राज ऋषिले मिलेर निर्देशन गर्दैछन् ।

तिमल्सिनाले राज ऋषिले इरफान खान अभिनित सिनेमा ‘द लन्च बक्स’ निर्देशक रितेश बत्राको सहायक निर्देशकको रुपमा साथै ‘जाने तु या जाने ना’ फेम्ड निर्देशक अब्बास टायरवालाको सहायक निर्देशक भएर पनि काम गरेका थिए । उनले फेन्टाम, रिलायन्स, अपालज र जी फाइभजस्ता बलिउड निर्माण कम्पनीसँग सहायक लेखक तथा बलिउड अभिनेत्री प्रियंका चोपडाको पर्पल पिबल पिक्सर्चले निर्माण गरेको सिनेमा ‘पाहुना : द लिटिल भिजिटर्स’मा संवाद लेखकको रुपमा काम गरेका छन् ।

‘सम्बोधन’पछि अभिनेता दयाहाङ राईले अनन्या फिल्म्ससँग दोस्रोपटक सहकार्य गर्न लागेका हुन् । तिहारलगत्तै छायांकन हुने सिनेमाको बजेट तीन करोड बताइएको छ । सिनेमाको छायांकन काठमाडौं, काभ्रेपलाञ्चोक र झापा जिल्लामा तयारी छ । निर्माता न्यौपाने फागुनमा अनमोल केसी र आना शर्माको मुख्य भुमिका रहने सिनेमा ‘जेरी अनटप’को छायांकनको तयारीमा छन् ।