आजै हिरासतमुक्त हुँदै अभिनेता अनमोल केसी

इटहरी/ निर्माण तयारीमा रहेको फिल्म ‘रामायण’ युनिटको उजुरीमा पक्राउ परेका अभिनेता अनमोल केसी आज हिरासतमुक्त हुने भएका छन् । उनलाई फिल्मको लागी १० लाख अग्रिम भुक्तानी लिएर अन्तिम अवस्थामा फिल्म छाडेर निर्माण युनिटको लगानीमाथी क्षती पुर्याएको भन्दै फिल्म युनिटले प्रहरीमा उजुरी दिएको थियो ।

सोही उजुरिको अधारमा पक्राउ परेका केसीलाई प्रहरीले हाजिरी जमानीमा छाेड्न लागेकाे हाे । आरोपीले प्रमाण नष्ट गर्ने सम्भावना नदेखिएको अवस्थामा सो प्रक्रियाका माध्यमबाट उनी हिरासतमुक्त हुन लागेका हुन् । पक्राउपछि प्रहरीले लिएको बयानमा अभिनेता अनमोल केसीले स्क्रिप्ट मन नपरेर आफूले फिल्म नखेलेको बताएका थिए ।

उनले बयानमा ‘निर्माताले १० लाख रुपैयाँ मेरो खातामा हालिदिएको हो। मैले फिर्ता लैजानूस भन्दा पनि उहाँहरुले मान्नुभएन ।’ भनेका थिए । अग्रिम लिएको रकम फिर्ता लैजान भन्दा पनि फिल्म निर्माण युनिटले नमानेको भनेका थिए । ३ दिन म्याद थपेको जिल्ला अदालत काठमाडौले शुक्रबारबाट गणना भएकाले आजै म्याद सकिएको छ । त्यसैले प्रहरीले छाड्ने तयारी गरेको हो ।