इटहरी/ फिल्म निर्माता रामप्रसाद रिजालको मुटुमा गम्भीर समस्या देखिएकाले उपचारका लागि भारतको दिल्लीस्थित एपोलो हस्पिटलमा भर्ना भएका छन् । उनलाई केही समयअघि हृदयाघात भएको थियो । डाक्टरले उनको मुटुका तीन वटा भल्भ ९० प्रतिशत ब्लक भएको बताएका थिए । ‘अहिले धेरै नै असहज भएकाले दाई दिल्ली जानुभएको हो,’ निर्माता रामप्रसादका भाइ निर्देशक लक्ष्मण रिजालले भने,‘केही समय अघि नै उपचार गर्नुपर्ने हो तर ‘गणपति’ रिलिजको ब्यस्तताले समय मिलेन ।’
३७ बर्षीय रामप्रसाद आफू पूर्णरुपले निको हुनेमा बिश्वस्त छन् । आर्थिक नोक्सानी बेहोर्नु परे तापनि निरन्तर रुपमा फिल्म निर्माणमा सक्रिय रामप्रसादले हालसम्म ‘वान डे’,‘कसम’,‘धुवाँ यो नशा’,‘कायरा’, ‘डिसेम्बर फल्स’ र ‘गणपति’ फिल्म निर्माण गरिसकेका छन् । फिल्मलाई ब्याबसाय भन्दा पनि कला, संस्कृतिको सशक्त माध्यमको रुपमा लिएको बताउने उनी अब ‘काजी’ नामक फिल्म निर्माणको तयारीमा छन् । लक्ष्मण रिजालको निर्देशनमा बिपीन कार्की र बर्षा शिवाकोटी स्टारर ‘काजी’ को हाल प्रि-प्रोडक्सन भइरहेको छ ।
Discussion about this post