इलामलाई ‘नेचुरल फिल्म स्टुडियो’ बनाउने खाकासहित सन्दकपुर महोत्सव सम्पन्न

इटहरी/ चिया बगान र मनमोहक प्रकृतिका लागि प्रख्यात इलाम अब ‘फिल्म पर्यटन’ को नयाँ गन्तव्य बन्ने बाटोमा अग्रसर भएको छ । दुर्लभ वन्यजन्तु रेड पाण्डाको संरक्षण र फिल्म पर्यटनलाई एकैसाथ जोड्ने दूरगामी सङ्कल्प गर्दै इलामको सन्दकपुर-४, कालपोखरीमा आयोजित ‘तेस्रो रेड पाण्डा महोत्सव २०२६’ सफलताका साथ सम्पन्न भएको छ । चैत २० गते कोशी प्रदेशका पर्यटन, वन तथा वातावरण मन्त्री भिम पराजुलीबाट उद्घाटन भई चैत २३ गते समापन भएको यस महोत्सवले नेपाल र भारतबीचको ‘क्रस-बोर्डर पर्यटन’ प्रवर्द्धनमा नयाँ इँटा थपेको छ ।

यस वर्षको महोत्सवमा पर्यटन र फिल्म क्षेत्रको अन्तर्सम्बन्धबारे गरिएको प्यानल छलफल विशेष आकर्षण बन्यो । पत्रकारद्वय सुजन तिम्सिना र विप्लव भट्टराईद्वारा सञ्चालित उक्त अन्तरक्रियामा फिल्मकर्मी र सरोकारवालाहरूले इलामको सम्भावनाबारे गहन मन्थन गरेका थिए ।

चलचित्र विकास बोर्डका सदस्य केवल तामाङले इलाम र सन्दकपुरको कला, भाषा, र संस्कृतिको संरक्षण गर्दै यस क्षेत्रलाई ‘नेचुरल फिल्म स्टुडियो’को रूपमा विकास गर्नुपर्ने बलियो धारणा राखे । सिक्किम चलचित्र बोर्डका प्रतिनिधि पविरत्न शाक्य, कल्चर विङका सचिव किरण लेप्चा र नायिका श्यामाश्री शेर्पालगायतको टोलीले महोत्सवमा सहभागिता जनाएको थियो । नायिका शेर्पाले सिक्किमका मुख्यमन्त्री प्रेम सिंह तामाङ (गोले) को भिजनअनुसार त्यहाँ भइरहेको पर्यटन र फिल्मको विकासको दृष्टान्त दिँदै दुई देशका फिल्मकर्मीबीच सहकार्य अपरिहार्य रहेको बताईन् ।

पविरत्न शाक्यले नेपाल र सिक्किमबीच सहकार्य गरी फिल्म निर्माण र पर्यटन प्रवर्द्धनमा टेवा पुर्‍याउन सिक्किम सदैव तयार रहेको प्रष्ट पारे । सन्दकपुर गाउँपालिकाका अध्यक्ष तुलाराम गुरुङले छायाङ्कनका लागि आउने जो-कोहीलाई स्थानीय सरकारले पूर्ण रूपमा आवश्यक सहयोग गर्ने प्रतिबद्धता व्यक्त गरे । फिल्म पर्यटनसँगै महोत्सवको मूल मर्म रेड पाण्डाको संरक्षण र पर्यापर्यटन प्रवर्द्धन गर्नु नै थियो । महोत्सवले पर्यटकहरूलाई यस क्षेत्रको समृद्ध जैविक विविधतासँग नजिक गराउने लक्ष्य राखेको छ ।

सन्दकपुरको माबु दोवाटे, जौवारी, हाागेथाम, जमुनाको चोयाटार, टप्पु तथा माईजोगमाई र जोगमाईका सामुदायिक वनहरू रेड पाण्डाका लागि प्रख्यात छन् । माईपोखरीदेखि ढापपोखरी हुँदै जौबारीसम्म जोडिएको यो पदमार्ग पर्यटकका लागि मुख्य आकर्षण हो । यहाँ पदयात्रा गर्दा दुर्लभ रेड पाण्डा, मुनाललगायतका सयौँ प्रजातिका चराचुरुङ्गीहरूको अध्ययन र अवलोकन गर्न सकिन्छ । केचना-कञ्चनजङ्घा पर्यटन विकास समितिका पूर्व कार्यकारी निर्देशक केशव धौरालीका अनुसार यस्ता कार्यक्रमले समग्र पर्यटन क्षेत्रमै महत्त्वपूर्ण योगदान पुर्‍याउँछन् ।

यस पटकको महोत्सवमा भारतको बङ्गाल, आसाम, दार्जिलिङ, मेघालय र दिल्लीलगायतका स्थानबाट पर्यटन अभियन्ताहरूको बाक्लो उपस्थिति हुनुले ‘क्रस-बोर्डर पर्यटन’ को लक्ष्य साकार हुँदै गएको पुष्टि गर्छ । वि.सं. २०८० र २०८१ मा दुई संस्करण सफलतापूर्वक सम्पन्न भइसकेको यस महोत्सवलाई यस वर्ष नेपाल पर्यटन बोर्ड, कोशी प्रदेश पर्यटन कार्यालय झापा, केचना-कञ्चनजङ्घा पर्यटन विकास समिति र रेड पाण्डा नेटवर्कलगायतका संस्थाहरूले प्रवर्द्धन गरेका थिए । तेस्रो संस्करणको समापनसँगै सन्दकपुरले प्रकृतिको संरक्षण गर्दै इलामलाई फिल्म र पर्यटनको उत्कृष्ट सङ्गम बनाउने स्पष्ट सन्देश दिएको छ ।