९औं निफमा उत्कृष्ट फिल्म बन्यो ‘राजागंज’ र ‘गुन्यू चोलो’, नाजिर र सुरक्षा उत्कृष्ट कलाकार

इटहरी/ नवौं संस्करणको नेपाल अन्तर्राष्ट्रिय चलचित्र महोत्सव (निफ) सोमबार राजधानीमा भव्यताका साथ सम्पन्न भएको छ । काठमाडौंको सुन्धारास्थित सिभिल मलमा आयोजित समापन समारोहमा दीपक रौनियार निर्देशित ‘राजागंज : पूजा सर’ ले सर्वोत्कृष्ट अन्तर्राष्ट्रिय फिल्म र समुन्द्र भट्ट निर्देशित ‘गुन्यू चोलो : द ड्रेस’ ले सर्वोत्कृष्ट राष्ट्रिय फिल्मको उपाधि जितेका छन् । नेपाल ललितकला प्रज्ञा–प्रतिष्ठानका कुलपति नारदमणि हार्तम्छालीको प्रमुख आतिथ्यतामा सम्पन्न कार्यक्रममा ‘राजागंज : पूजा सर’ लाई ट्रफीसहित १ हजार ५ सय अमेरिकी डलर र ‘गुन्यू चोलो’लाई ट्रफीसहित १ हजार अमेरिकी डलर नगद पुरस्कार प्रदान गरिएको छ ।

राष्ट्रिय प्रतिस्पर्धाअन्तर्गत उत्कृष्ट निर्देशकको अवार्ड ‘गुन्यू चोलो’बाट समुन्द्र भट्टले हात पारिन् भने सोही फिल्मबाट नाजिर हुसेन सर्वोत्कृष्ट नायक घोषित भए । यसैगरी, फिल्म ‘कोशेढुङ्गा’बाट सुरक्षा पन्तले सर्वोत्कृष्ट नायिका र बाबु श्रेष्ठले सर्वोत्कृष्ट छायाँकारको अवार्ड जित्न सफल भए । फिल्म ‘केटी हराएको सूचना’बाट दीपेन्द्र गौचनले सर्वोत्कृष्ट पटकथाकारको अवार्ड उचालेका छन् । राष्ट्रियतर्फको सर्वोत्कृष्ट डकुमेन्ट्रीको अवार्ड दीपक छोदेन लामा निर्देशित ‘होम इज नट अ प्लेस’ र सर्वोत्कृष्ट सर्ट फिल्मको अवार्ड सुरज पौडेल निर्देशित ‘रिहाना’ ले जितेका छन् ।

यी दुवैले ट्रफीसहित जनही ५० हजार रुपैयाँ प्राप्त गरे । दक्षिण एसियाली प्रतिस्पर्धाअन्तर्गत नेपाली भाषाको भारतीय फिल्म ‘जार’ सर्वोत्कृष्ट घोषित भयो । फुर्वा क्षिरिङ लामा निर्देशित यस फिल्मले ५ सय डलर प्राप्त गरेको छ ।

अन्य प्रमुख अन्तर्राष्ट्रिय विजेताहरू यसप्रकार छन्:
– सर्वोत्कृष्ट अन्तर्राष्ट्रिय डकुमेन्ट्री: ग्राउन्ड बिनिथ आवर फिट (आइसल्यान्ड, निर्देशक: इर्सा रोका फ्यानबर्ग) – १ हजार डलर र ट्रफी
– सर्वोत्कृष्ट अन्तर्राष्ट्रिय सर्ट फिल्म: सिप (इरान, निर्देशक: हादी बाबेइफर) – ५ सय डलर र ट्रफी
– सर्वोत्कृष्ट एआई थिम्ड सर्ट फिल्म: स्पिरिट अफ द माउन्टेन (चीन, निर्देशक: पाङ जिया) – ५ सय डलर र ट्रफी
– सर्वोत्कृष्ट विद्यार्थी चलचित्र: पासारिन्हो (मेक्सिको) – ५ सय डलर र ट्रफी
– डन किहोते सर्वोत्कृष्ट अन्तर्राष्ट्रिय चलचित्र: माई डटर्ज हेयर (इरान, निर्देशक: हेसाम फराहमान्द) – प्रमाणपत्र

यस्तै, चिनियाँ फिल्म ‘द शोर अफ लाइफ’ले ‘स्पेशल जुरी मेन्सन’ अवार्ड प्राप्त गर्‍यो । ङिमा गेलु शेर्पा निर्देशित राष्ट्रिय डकुमेन्ट्री ‘एज डे गोज बाइ’ र सुर्या बालाकृष्ण निर्देशित भारतीय सर्ट फिल्म ‘हाउसकिप्पर’लाई ‘स्पेशल मेन्सन’ को प्रमाणपत्र प्रदान गरिएको आयोजकले जनाएको छ । समापन समारोहलाई सम्बोधन गर्दै प्रमुख अतिथि कुलपति हार्तम्छालीले निफ जस्ता महोत्सवले नेपाली फिल्मलाई विदेशी फिल्म उद्योगसँग जोड्न र सम्बन्ध विस्तार गर्न महत्त्वपूर्ण काम गरेको बताए । चैत १९ गतेबाट सुरु भएको यस महोत्सवलाई सफल बनाउन सहयोग गर्ने सम्पूर्ण फिल्मकर्मी, दर्शक र प्रायोजकहरूलाई धन्यवाद दिँदै निफका अध्यक्ष केपी पाठकले नवौं संस्करणको औपचारिक समापन गरेका थिए ।