अंशबण्डा विवाद चर्कियो: उषा खड्गीको उजुरीपछि पूर्वपति जीपी पक्राउ

इटहरी/ सामाजिक सञ्जालमार्फत आफ्नो सुरक्षा र न्यायको अपिल गरेकी पूर्वमिस नेपाल तथा अभिनेत्री उषा खड्गी अन्ततः कानुनी उपचारमा पुगेकी छन् । उनले दिएको जाहेरीका आधारमा प्रहरीले सञ्चारकर्मी तथा उनका पूर्वपति जीपी तिमल्सिनालाई मंगलबार पक्राउ गरेको छ । उषाले सोमबार भक्तपुर प्रहरी परिसरमा आफूमाथि अभद्र व्यवहार भएको, धम्की दिइएको र कुटपिटको प्रयास समेत भएको भन्दै जाहेरी दर्ता गराएकी थिइन् ।

उजुरी परेलगत्तै प्रहरीले सोमबार नै दुवै पक्षलाई बोलाएर विवाद समाधानका लागि छलफल गराएको थियो । यद्यपि, छलफलमा कुरा नमिलेपछि कानुनी प्रक्रिया अघि बढाउन तिमल्सिनालाई मंगलबार नियन्त्रणमा लिइएको हो । कानुनी कदम चाल्नुअघि गत चैत १७ गते उषाले फेसबुकमा श्रृंखलाबद्ध स्टाटस लेख्दै नयाँ सरकारसँग न्याय मागेकी थिइन् । आफ्नो जीवनमा निरन्तर हस्तक्षेप भइरहेको र अंशवण्डाको विषय नटुंगिएको भन्दै उनले आफूलाई शान्ति सुरक्षा चाहिएको बताएकी थिइन् ।

सोही समयमा उनले प्रहरी र प्रशासनमा जाने स्पष्ट संकेत गरेकी थिइन् । उषा र जीपीबीच २०७९ साल जेठ २६ गते काठमाडौं जिल्ला अदालतबाट सम्बन्धविच्छेद भएको थियो । कानुनबमोजिम अंशवण्डाको टुंगो नलाग्दै, सम्बन्धविच्छेद भएको करिब ६ महिनापछि अर्थात् २०७९ मंसिर १९ गते जीपीले प्रेमिका सविना अधिकारीसँग दोस्रो विवाह गरेका थिए । लामो समयदेखि चल्दै आएको अंशवण्डाको विवाद र व्यक्तिगत जीवनको टकराव नै बढ्दै गएर अन्ततः यो प्रकरण प्रहरी खोरसम्म पुगेको हो ।