परिवारले नै चिनेनन् टिकटक स्टार आयुषको बोली, ‘राम नाम सत्य’मा कस्तो छ उनको भूमिका ?

इटहरी/ टिकटकका छोटा भिडियो हरु मार्फत लाखौं दर्शकको मन जितेका आयुष सिंह ठकुरी अब अढाई घण्टा लामो फिल्मको पर्दामा आफ्नो जादु देखाउन तयार भएका छन् । माइकल चन्दको लेखन तथा निर्देशनमा निर्माण भएको सस्पेन्स-थ्रिलर फिल्म ‘राम नाम सत्य’ मार्फत उनले नेपाली फिल्म उद्योगमा डेब्यु गर्दैछन् । नयाँ वर्षको छेको पारेर यो फिल्म यही चैत २७ गते शुक्रबारदेखि देशभरका फिल्म हलहरूमा प्रदर्शन हुँदैछ ।

फिल्म रिलिजको संघारमा मिडियासँग अन्तरक्रिया गर्दै आयुषले आफ्नो पहिलो पाइलालाई लिएर निकै उत्साहित रहेको बताए । उनका अनुसार, उनलाई फिल्मका अफरहरू नआएका होइनन्, तर ‘राम नाम सत्य’ को दमदार कथावस्तुले उनलाई यति धेरै तान्यो कि उनले यसैबाट आफ्नो यात्रा सुरु गर्ने निधो गरे । फिल्ममा आयुषको भूमिका दर्शकका लागि ठूलो ‘सरप्राइज’ हुनेछ । ट्रेलरमा समावेश उनको एउटा संवादमा उनले यति धेरै मिहिनेत गरेका छन् कि, त्यो सुनेर सुरुमा उनका आफ्नै परिवार र आफन्तले समेत उनको आवाज चिन्न सकेनन् ।

आफूले फिल्मको व्यापार भन्दा पनि दर्शकको मायालाई प्राथमिकतामा राखेको आयुष बताउँछन् । यद्यपि, उनको क्रेज लोभलाग्दो छ । विदेशमा बस्ने नेपालीहरूले नेपालमा रहेका आफ्ना साथीभाइ र आफन्तका लागि टिकट काटिदिने र हल नै बुक गरिदिने जस्ता उत्साहजनक प्रतिक्रिया दिइरहेका छन् । निर्माण पक्षले यस फिल्मको सिक्वेल पनि बनाउने तयारी गरिरहेको छ । आयुषले भनेका छन्, “सिक्वेलमा मेरो भूमिका कस्तो हुन्छ भनेर बुझ्न दर्शकले पहिलो भाग कुनै हालतमा छुटाउनु हुँदैन ।”

@parikalanewsofficial

यस फिल्ममा आफ्नो शतप्रतिशत दिएका आयुषले अब फिल्म क्षेत्रलाई नै आफ्नो कर्मथलो बनाउने संकेत गरेका छन् । हतारिएर काम नगर्ने तर आफूलाई निखार्दै निरन्तर अघि बढ्ने उनको अठोट छ । उपेन्द्र शाही र स्वेता विमलीको निर्माण रहेको यस फिल्ममा आयुषका साथै विराज भट्ट, सुशील श्रेष्ठ, सुपुष्पा भट्ट, दिव्या रायमाझी, सुनील थापा, प्रशान्त ताम्राकार र खुशी कार्की जस्ता चर्चित अनुहारहरूको बलियो उपस्थिति छ । बलियो कथावस्तु र सस्पेन्सले भरिपूर्ण यो फिल्म नयाँ वर्षमा ‘सोलो रिलिज’ हुँदैछ । दर्शकको उत्साह र फिल्मको हाइपलाई हेर्दा ‘राम नाम सत्य’ले बक्स अफिसमा बम्पर ओपनिङ गर्ने बलियो सम्भावना रहेको विश्लेषण वितरकहरूले गरेका छन् ।