इटहरी/ सामाजिक सञ्जालको एउटा स्ट्याटसले एउटा कलाकारको दशकौँ लामो प्रतिष्ठा कसरी क्षणभरमै धरापमा पार्न सक्छ भन्ने पछिल्लो उदाहरण बनेका छन्, चर्चित अभिनेता सागर लम्साल ‘बले’। अमेरिकामा बस्ने एक युवतीले फेसबुकमा बलात्कारको आरोप लगाएको तीन दिन बितिसक्दा पनि प्रहरीमा कुनै औपचारिक जाहेरी परेको छैन । तर, जाहेरी विनै आइतबार पक्राउ परेपछि सागर यतिबेला हिरासतमा छन् भने उनी अभिनित नयाँ फिल्मको भविष्य पनि चरम अन्योलमा परेको छ । अर्को छायांकनरत फिल्म ‘पाँच पाण्डव’ बाट त औपचारिक निष्कासित नै भए ।
विना जाहेरी थुनामा पुगेका सागरलाई भेट्न आज निर्देशक राजु गिरी कारागार पुगेका थिए । भेटका क्रममा आफ्नो अवस्था र बिग्रिएको छविलाई सम्झेर सागर भक्कानिएर रोएको गिरीले बताए । सागरको भनाइ उद्धृत गर्दै निर्देशक गिरीले भने, “१७ वर्षको मेहनत आज १७ सेकेन्डमै गयो भन्दै सागरको आँखाबाट आँसु झर्यो । उसको त्यो हालत देखेर मेरो पनि आँसु थामिएन । मैले ‘सत्यको जित हुन्छ’ भनेर सम्झाएर आएको छु ।”
एक वर्ष अघिको घटनालाई लिएर विना जाहेरी प्रहरीले देखाएको हतारो र एकतर्फी कानुनी अभ्यासप्रति निर्देशक गिरीले गम्भीर प्रश्न उठाएका छन् । कानुन महिलामुखी मात्र भएको भन्दै उनले आक्रोश पोखे । “पुरुषलाई मात्र बलात्कारको मुद्दा लाग्ने, महिलाले जे भने पनि हुने ? आरोप लगाउने चेली पनि हाम्रै चेली हुन्, तर एक वर्षसम्म उनी के हेरेर बसिन् ?” परिकला न्यूजसँगको कुराकानीमा गिरीले प्रश्न गरे, “विना जाहेरी पक्राउ गर्ने सरकारको यो कस्तो नियम हो, मैले बुझिनँ । मेरो प्रस्ट भनाइ छ- दोषीलाई कडा सजाय होस्, तर निर्दोषलाई फसाउने काम नहोस् ।”
यस अनपेक्षित घटनाले सागर प्रमुख भूमिकामा रहेको नयाँ फिल्म ‘डल्लेले इन्ट्री मार्यो’को प्रदर्शन पनि संकटमा परेको छ । राजु गिरीकै निर्देशन रहेको यो फिल्म यही चैत २७ गते सार्वजनिक प्रदर्शनमा ल्याउने प्रारम्भिक तयारी थियो । निर्देशक गिरीका अनुसार, सागरमाथि आरोप लाग्नु र उनी पक्राउ पर्नुभन्दा अघि नै फिल्मको रिलिज स्थगित गरिएको थियो । पर्याप्त प्रचारप्रसारको अभाव र एउटा गीतको छायांकन बाँकी रहेकाले प्रदर्शन सारिएको थियो । तर, अहिले मुख्य अभिनेता नै कानुनी झमेलामा फसेपछि अब यो फिल्मलाई कहिले र कसरी रिलिज गर्ने भन्ने विषयमा आफू पूर्ण रूपमा अन्योलमा परेको निर्देशक गिरीले बताएका छन् ।
Discussion about this post