लालिबजारकी स्वस्तिमा र समाइराको जोडीले ततायो सामाजिक सञ्जाल

इटहरी/ पर्दामा जब स्थापित अभिनेत्री र ऊर्जावान बालकलाकारको सानदार जुगलबन्दी देखिन्छ, तब दर्शकको मन जित्न गाह्रो पर्दैन । षट्कोण आर्टसको निर्माणमा आउन लागेको फिल्म ‘लालीबजार’ को पहिलो गीत ‘मायालाई के दिउँ म बैना’ ले अहिले यही प्रमाणित गरिरहेको छ । विशुद्ध नेपाली लोकभाकामा तयार पारिएको यो गीत यतिबेला बच्चादेखि वृद्धसम्मको ओठमा झुन्डिएको छ भने सामाजिक सञ्जालको ट्रेन्डिङमा राज गरिरहेको छ ।

गत फागुन २९ गते शुक्रबार सार्वजनिक भएको यो गीतले छोटो समयमै युट्युबमा १४ लाख बढी भ्युज बटुलिसकेको छ । तर, यसको खास जादु टिकटक र फेसबुक रील्समा देखिएको छ । अभिनेत्री स्वस्तिमा खड्का र बालकलाकार समाइरा थापाको आकर्षक डान्स स्टेपलाई हुबहु कपी गर्दै भिडियो बनाउने कन्टेन्ट क्रिएटर र साधारण प्रयोगकर्ताहरूको बाढी नै आएको छ । दर्शकहरूले गीतको ठेठ लय, स्वर र कोरियोग्राफीको मुक्तकण्ठले तारिफ गरेका छन् । हेर्नुस् भिडियो ।

गीतले पाइरहेको अपार सफलताबाट अभिनेत्री स्वस्तिमा खड्का निकै हर्षित छिन् । सुटिङका क्रममा दृश्यहरू छायांकन गरेर बचेको समयलाई सदुपयोग गर्दै उनीहरूले यसको अभ्यास गरेका थिए । “हाम्री बालकलाकार समाइराले गज्जब नृत्य गरेकी छिन् । यी सानी नानीको कामले मलाई पनि थप मेहनत गर्न प्रेरणा दियो,” स्वस्तिमाले आफ्नो अनुभव सुनाइन्, “हामी सबैको प्रयास र दर्शकको मायाले अहिले मेहनतको फल पाएको आभास भएको छ ।”

फिल्मका निर्देशक यम थापाका अनुसार यो गीत केवल दर्शक नचाउन मात्र राखिएको होइन, यसले फिल्मको कथालाई नै अगाडि बढाउने काम गर्छ । यस गीतमा चर्चित गीत ‘कश्मिरे पछ्यौरी’ की गायिका दीपिका बयाम्बु मगर र गायक तथा सङ्गीतकार खेम सेन्चुरीको जादुमयी स्वर सुन्न सकिन्छ । रमेश बिजीका शब्दहरूलाई प्रदीप लामाले उत्कृष्ट कोरियोग्राफीमा ढालेका हुन् ।

@parikalanewsofficial

आगामी वर्ष २०८३ वैशाख १८ गते रिलिज हुने यो फिल्मको कथा याम थापाको हो भने उनैले निर्देशन पनि गरेका छन्। फिल्मको पटकथा तथा संवादमा निर्देशक थापा र प्रदीप भट्टराईले संयुक्त रुपमा तयार गरेका हुन् । म्याक्स दीपेश खत्री र रवीन्द्रसिंह बानियाँ निर्माता रहेको फिल्मको कार्यकारी निर्माता प्रदीप भट्टराई हुन । यो फिल्ममा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल लगायतको अभिनय रहेको छ । थिएटर कलाकार विशाल देवकोटा र प्रसंशा सुवेदीले यो फिल्मबाट डेब्यु गर्दैछन् ।