जम्बो स्टारकास्टका साथ झापाबाट सुरु भयो ‘पाँच पाण्डव’को सुटिङ

इटहरी/ पौराणिक नाम सुन्दा जो-कोहीलाई लाग्न सक्छ-यो महाभारतकै कथा हो । तर, त्यही ‘पाँच पाण्डव’को बिम्बलाई प्रयोग गरेर वर्तमान नेपाली समाजको यथार्थ बोल्ने एउटा ठूलो क्यानभासको फिल्म निर्माण सुरु भएको छ । नेपाली फिल्म क्षेत्रका दिग्गज अभिनेतादेखि नयाँ पुस्ताका चर्चित स्टारहरूसम्मको बलियो लाइनअप रहेको बहुप्रतीक्षित फिल्म ‘पाँच पाण्डव’को छायांकन सोमबारबाट औपचारिक रूपमा थालिएको छ ।

झापाको नेपाल–भारत सीमावर्ती सहर काँकडभिट्टामा क्यामेरा पूजा गरेर शुभ–मुहूर्त गर्दै यो फिल्म फ्लोरमा गएको हो । काली रानी फिल्मस्को ब्यानरमा बन्न लागेको यस ‘सोसल ड्रामा’मा मुख्य ५ पात्रका रूपमा यी चर्चित अनुहारहरू हरिवंश आचार्य, जितु नेपाल, आर्यन सिग्देल, महेश त्रिपाठी र सागर लम्साल (बले) देखिनेछन् । यसका साथै, फिल्मका मुख्य महिला पात्रको भूमिकामा अभिनेत्री दीपाश्री निरौला र जनी गुरुङलाई छनोट गरिएको छ ।

यस फिल्मलाई वर्षकै ठूलो र प्रतीक्षित प्रोजेक्ट मानिनुको पछाडि यसको निर्माण टिमको पनि ठूलो हात छ । दर्शक र समीक्षक दुवैले रुचाएको सुपरहिट फिल्म ‘प्रसाद’का लेखक सुशील पौडेलले यसको कथा, पटकथा र संवाद तयार पारेका हुन् । वसन्त निरौलाको निर्देशन रहने यस फिल्मलाई श्याम तामाङले क्यामेरामा कैद गर्नेछन् । काली रानी श्रेष्ठ निर्माता रहेको फिल्मको नवीन श्रेष्ठ प्रस्तुतकर्ता रहेका छन् ।

@parikalanewsofficial

दर्शकले यसमा ‘फूल डल्बी एट्मस’ साउन्डको मज्जा लिन पाउनेछन् । म्युजिक नेपालले भर्खरै सञ्चालनमा ल्याएको डल्बी एट्मस स्टुडियोमा यसको साउन्ड डिजाइन हुनेछ । प्रस्तुतकर्ता नवीन श्रेष्ठले कलाकारहरूको लाइनअपले नै फिल्मको आकार कति ठूलो छ भन्ने प्रस्ट पार्ने बताए । “हामीले वर्षौंसम्म सम्झिन लायक ऐतिहासिक फिल्म बनाउने संकल्प गरेका छौँ, त्यसैले मेकिङ र बजेटमा कुनै कम्प्रमाइज हुनेछैन,” उनले भने । निर्देशक निरौलाका अनुसार करिब ४० दिनको छायांकन तालिका रहेको यस फिल्मका अधिकांश दृश्यहरू झापामै खिचिनेछन् ।