रगतको नातामा सम्पत्तिको पर्खाल: ‘हामी तीन भाइ’को ट्रेलरमा देखियो पारिवारिक कथाको यथार्थ

इटहरी/ विवाहपछि दाजुभाइको आत्मीयतामा कसरी स्वार्थको पर्खाल ठडिन्छ ? अनि, एउटै आँगनमा हुर्किएका दाजुभाइबीच पैतृक सम्पत्तिको भागबन्डाले कसरी मनमुटाव सिर्जना गर्छ ? नेपाली समाजको यही तीतो तर यथार्थपरक पारिवारिक कथा बोकेको नयाँ फिल्म ‘हामी तीन भाइ’को ट्रेलर सार्वजनिक भएको छ । सोमबार सार्वजनिक गरिएको करिब ४ मिनेट लामो ट्रेलरले फिल्मको केन्द्रीय द्वन्द्वलाई छर्लङ्ग पारेको छ ।

ट्रेलरमा विशेषगरी विवाहपश्चात घरमा भित्रिने नयाँ सम्बन्धहरू र जग्गा भागबन्डालाई लिएर सुरु हुने पारिवारिक कलहलाई निकै मार्मिक ढंगले प्रस्तुत गरिएको छ । दर्शकले यो पारिवारिक ड्रामा हेर्न धेरै कुर्नुपर्ने छैन । निर्माण पक्षका अनुसार, यो फिल्म आगामी चैत १३ गते, राम नवमीको शुभ अवसर पारेर देशभरका फिल्म हलहरुमा प्रदर्शन हुनेछ । हेर्नुस् ट्रेलर

मधुसुदन भट्टराईको निर्देशनमा निर्माण भएको यस फिल्ममा नेपाली फिल्म क्षेत्रका थुप्रै स्थापित अनुहारहरूको अभिनय रहेको छ । फिल्ममा विनोद न्यौपाने, लक्ष्मी बर्देवा, कुशल बिष्ट, आश्मा गिरी, जाहन्वी बस्नेत, र फलित राईको प्रमुख भूमिकामा अभिनय रहेको छ । यस्तै राजाराम पौडेल, रविन्द्र झा, बिष्णु सापकोटा, विकास चापागाईं, सुष्मा निरौला, यादव देवकोटा, अन्जु हमाल, तारा शर्मा, पवन केसी र विरेन श्रेष्ठ लगायतका कलाकारहरूको पनि यसमा अभिनय रहेको छ ।

@parikalanewsofficial

साजित महतको प्रस्तुति रहेको यस फिल्मको कथा शिवम् अधिकारीले लेखेका हुन् । त्रिरत्न श्रेष्ठ र मनोज श्रेष्ठले निर्माण गरेको यो फिल्ममा विक्रम तामाङ कार्यकारी निर्माता रहेका छन् भने भक्तलाल श्रेष्ठ, प्रतिमा थापा पोखरेल र दुर्गालक्ष्मी पाण्डे सह-निर्माताको रूपमा जोडिएका छन् । त्यसैगरी, शिव ढकालको छायांकन रहेको फिल्मलाई बनिष शाहले सम्पादन गरेका हुन् । फिल्ममा साप शक्ति र बाबुल गिरीको सङ्गीत सुन्न सकिन्छ भने कमल राईले नृत्य निर्देशन गरेका छन् । नेपाली मौलिक र पारिवारिक कथा खोज्ने दर्शकहरूको लागि ‘हामी तीन भाइ’ एउटा उत्कृष्ट रोजाइ बन्न सक्ने ट्रेलरले संकेत गरेको छ ।