सांसद बनेकी अभिनेत्री रिमालाई केकीको पत्र: ‘तिम्रो निडर आवाज संसद्‌मा बुलन्द होस्’

इटहरी/ नेपाली फिल्म क्षेत्रका दुई प्रभावशाली अभिनेत्री रिमा विश्वकर्मा र केकी अधिकारी, हिजोसम्म उनीहरू एउटै पर्दा र मञ्चमा देखिन्थे । तर आज समय फेरिएको छ । रिमा अब संसद्‌मा ‘माननीय’ बनेर देशको नीति निर्माण गर्ने जिम्मेवारीमा पुगेकी छन् भने केकी उनलाई सडकबाटै खबरदारी गर्ने एक ‘सचेत नागरिक’ को भूमिकामा उभिएकी छन् । राष्ट्रिय स्वतन्त्र पार्टी (रास्वपा) बाट समानुपातिक सांसदमा निर्वाचित भएकी आफ्नी अनन्य मित्र रिमालाई सम्बोधन गर्दै केकीले सामाजिक सञ्जालमा पत्र लेखेकी छन् ।

उनले लेखेको उक्त स्टाटसमा शुभकामना मात्र नभई ‘चेतावनी र प्रश्न’ को भाव बोकेको छ । यो सन्देशले राजनीतिमा प्रवेश गरेका कलाकारहरूमाथि हुनुपर्ने नागरिक निगरानीको एउटा सुन्दर नमुना प्रस्तुत गरेको छ । केकीले रिमालाई आफ्नो पुरानो निडर स्वभाव नभुल्न र संसद्‌मा कसैको दबाबमा नपर्न आग्रह गरेकी छन् । उनले लेखेकी छन्, “देश र जनताको हितको लागि बोल्नुपर्दा, चाहे त्यसले आफ्नै नजिकका वा आफ्नै पार्टीमा भएकालाई निराश बनाउने भए पनि तिमी कहिल्यै नहिच्किचाउनु । तिम्रो त्यो निडर आवाज संसद् भवनभित्र अझै बुलन्द र प्रष्ट सुनियोस् ।”

@parikalanewsofficial

धेरैले बधाई दिएर मात्रै छोड्ने बेला केकीले भने रिमालाई संसद्‌मा सधैं पछ्याइरहने र प्रश्न सोधिरहने वाचा गरेकी छन् । आफूलाई एक ‘खरो समीक्षक’ र ‘सचेत प्रतिपक्ष’ को रूपमा उभ्याउँदै उनले रिमाको कार्यसम्पादनमा कडा नजर राख्ने बताएकी छन् । भावुक हुँदै केकीले रिमाको यो नयाँ यात्राले देशमा नयाँ आशा र परिवर्तनको लहर ल्याउने विश्वास व्यक्त गरेकी छन् । “तिमी तिमी भएकोमा मलाई अत्यन्त गर्व छ र सधैं गर्व गरिरहन पाऊँ,” भन्दै उनले रिमाको राजनीतिक सफलताको कामना गरेकी छन् । एउटै विधाबाट संघर्ष गरेर आएका दुई साथीमध्ये एक नीति निर्माणको सर्वोच्च थलोमा पुग्दा अर्कीले देखाएको यो परिपक्वता र सचेत भावलाई धेरैले ‘सराहनीय’ भनेका छन् ।