इटहरी/ गुरुप्रसाद मैनालीको अमर कथामा आधारित रहेर निर्माण गरिएको बहुप्रतिक्षित फिल्म ‘परालको आगो’को नयाँ गीत सार्वजनिक भएको छ । स्वरकिन्नरी अरुणा लामाको आवाजमा सजिएको कालजयी गीत ‘उडी जाउँ भने म पंक्षी होइन’लाई यस फिल्ममा नयाँ स्वरूपमा प्रस्तुत गरिएको हो । सार्वजनिक गीतको भिडियोमा फिल्मका प्रमुख कलाकारहरू सुहाना थापा र प्रकाश सपुतलाई फिचर्ड गरिएको छ । भिडियोमा सुहानालाई गाउँले परिवेशकी एक उदासिन र विरक्त महिलाको भूमिकामा देख्न सकिन्छ भने अभिनेता सपुत पनि एक्लोपनमा रुमल्लिएको निकै गम्भीर र भावुक अवस्थामा प्रस्तुत भएका छन् ।
रामजी लामिछानेको कोरियोग्राफी रहेको यस भिडियोले दर्शकलाई निकै भावुक बनाउने देखिन्छ । मनबहादुर मुखियाको शब्द तथा शान्ति ठटालको पुरानै लय तथा सङ्गीत रहेको यस गीतको नयाँ संस्करणमा निशु शर्माले स्वर दिएकी छन् । म्युजिक नेपालको स्टुडियोमा रेकर्ड गरिएको यस गीतलाई विनोद भुजेलले एरेन्ज गरेका हुन् । गीतमा सञ्जीव बराइलीको गितार र गोपाल देवको बाँसुरीको धुन सुन्न सकिन्छ । हेर्नुस भिडियो
हरि ओम सिने मेकर्स प्रालिको प्रस्तुति रहेको यस फिल्मलाई लक्ष्मण सुनारले निर्देशन गरेका हुन् भने सुशील पोखरेलले निर्माण गरेका हुन् । सुशील देवकोटाको पटकथा तथा संवाद रहेको यस फिल्ममा सौगात मल्ल, सुहाना थापा र प्रकाश सपुत मुख्य भूमिकामा छन् । उनीहरूका साथै सिर्जना अधिकारी, शङ्कर आचार्य, किशोर भण्डारी, कुल बहादुर अधिकारीलगायतका कलाकारहरूको पनि अभिनय रहेको छ ।
आगामी २०८३ सालको वैशाख ११ गते अर्थात अप्रिल २४ बाट प्रदर्शनमा आउन लागेको यस फिल्ममा सङ्कल्प भुजेलको छायाङ्कन र मिलन श्रेष्ठको सम्पादन रहेको छ । फिल्ममा शान्ति ठटाल, सत्य-स्वरुप र प्रकाश सपुतको सङ्गीत सुन्न सकिनेछ । फिल्मको डिजिटल पार्टनर ओएसआर डिजिटल रहेको छ भने अमेरिका र क्यानडाका लागि ‘चलचित्र इन्टरटेनमेन्ट’ले वितरणको जिम्मा लिएको छ । पुराना पुस्ताको कालजयी सिर्जना र नयाँ पुस्ताका चर्चित अनुहारहरूको सङ्गम रहेको ‘परालको आगो’लाई दर्शकले निकै चासोका साथ हेरेका छन् ।
Discussion about this post