युवा पलायनले रित्तिएको गाउँको कथा बोकेर आउँदैछ तुलसी घिमिरेको ‘पहाड’, यस्तो छ टिजर

इटहरी/ युवा जनशक्ति दिनहुँ विदेशिँदा हाम्रा गाउँ र पहाडहरू कसरी रित्तिँदैछन् ? र, यसले हाम्रो समाजमा कस्तो आर्थिक तथा सामाजिक संकट निम्त्याइरहेको छ ? यही गम्भीर र यथार्थपरक विषयवस्तुलाई अब ठूलो पर्दामा देख्न पाइने भएको छ । नेपाली फिल्म क्षेत्रका ख्यातिप्राप्त निर्देशक तुलसी घिमिरेको लेखन तथा निर्देशन रहेको नयाँ फिल्म ‘पहाड’ को प्रतिक्षित टिजर सार्वजनिक भएको छ । यो फिल्म नयाँ वर्षको अवसर पारेर आगामी वैशाख १ गतेदेखि प्रदर्शनमा आउँदैछ ।

सार्वजनिक टिजरमा संवादलाई निकै कम स्थान दिइएको छ, तर दृश्यहरू आफैँमा निकै शक्तिशाली छन् । प्रेम, आक्रोश, वियोग र जीवनका बाध्यताहरूलाई समेटिएको टिजरले कथाको सम्पूर्ण पाटो नखोली सस्पेन्स कायम राखेको छ । टिजरमा फिल्मका अधिकांश मुख्य कलाकारको झलक देख्न सकिन्छ । ‘पहाड’ले नेपाली फिल्मका पुराना र सर्वाधिक रुचाइएका अनुहारहरूलाई फेरि एकै ठाउँमा ल्याएको छ । निर्देशक घिमिरेले ‘बलिदान’का मदनकृष्ण श्रेष्ठ तथा ‘चिनो’का शिव श्रेष्ठ र सुनील थापालाई फेरि एकपटक एउटै पर्दामा उतारेका छन् । हेर्नुस् टिजर ।

यसका साथै, विपीन कार्की, अरुण क्षेत्री, रवीन्द्रसिंह बानियाँ जस्ता प्रतिभाशाली पुस्ताको अभिनय यसमा रहनेछ । यसै फिल्ममार्फत निर्देशक घिमिरेले आफ्नी कान्छी छोरी पञ्चमी घिमिरेलाई अभिनेत्रीका रूपमा नेपाली फिल्ममा डेब्यु गराउँदैछन् । पुराना सहकर्मीहरूसँगको पुनर्मिलनबारे निर्देशक घिमिरे भन्छन्, “पटकथा तयार गर्दा पात्रहरूमा उहाँहरू नै फिट हुने देखेपछि मैले पुरानो सहकार्यलाई ताजा गर्ने प्रस्ताव राखेँ । सबैले सहमति जनाएपछि पुरानो समयलाई स्मरण गर्दै नयाँ उत्साहका साथ काम गरेका छौँ ।” उनले ‘पहाड’ केवल एउटा फिल्म मात्र नभई एउटा विचारको रुपमा दर्शकको घर-परिवार र समाजसम्म पुग्ने दाबी गरेका छन् ।

@parikalanewsofficial

फिल्मको छायांकन प्रमोद प्रधानले गरेका हुन् । भारतमा समेत काम गरिसकेका प्रधानले यसअघि घिमिरेका हिट फिल्महरू ‘अन्याय’, ‘कोसेली’, ‘चिनो’ र ‘दक्षिणा’मा छायांकनको जादु देखाइसकेका छन् । त्यसैगरी, संगीतको जिम्मा भेट्रान संगीतकार रञ्जित सिंह गजमेरले सम्हालेका छन् । यो फिल्ममा विपीन कार्की, सुनील थापा, मदनकृष्ण श्रेष्ठ, शिव श्रेष्ठ, रेनुनाथ योगी, अरुण क्षेत्री, रवीन्द्रसिंह बानियाँ, उमा गिरी र पञ्चमी घिमिरे प्रमुख भूमिकामा छन् । प्रस्तुतकर्ता उत्तम रसाइली रहेको फिल्मको निर्माता सुरेन्द्र लामा थिङ, ओजस्वी केसी, रिम्पोछे लामा थिङ र उमा गिरी हुन् भने क्रिएटिभ निर्माता भारती घिमिरे रहेका छन् ।