दयाहाङ र सौगातको ‘मितज्यू’ अब एक साता अगाडि नै रिलिज हुने, नयाँ पोस्टरमा देखियो गाउँले द्वन्द्व

इटहरी/ दयाहाङ राई र सौगात मल्लको सशक्त जोडी अनि चर्चित डान्सर तेरिया फौजा मगरको डेब्यु रहने प्रतीक्षित फिल्म ‘मितज्यू’ अब निर्धारित मितिभन्दा एक साता अगावै दर्शकमाझ आउने भएको छ । यसअघि जेठ १५ गते रिलिज गर्ने तयारीमा रहेको निर्माण पक्षले भारतीय ठूलो बजेटको फिल्म ‘टक्सिक’ सँगको सम्भावित व्यावसायिक भिडन्तलाई टार्न जेठ ८ गतेलाई नयाँ प्रदर्शन मिति तय गरेको हो । ‘टक्सिक’ र ‘मितज्यू’ दुवैको वितरक एउटै परेका कारण बक्स अफिसमा असर नपरोस् भनेर यो रणनीतिक निर्णय लिइएको बुझिएको छ ।

नयाँ प्रदर्शन मितिको घोषणासँगै आइतबार फिल्मको रहस्यमयी दोस्रो पोस्टर पनि सार्वजनिक गरिएको छ । सार्वजनिक नयाँ पोस्टरले फिल्मको कथावस्तु ग्रामीण परिवेश र त्यहाँभित्र लुकेको सामाजिक द्वन्द्वमा आधारित रहेको स्पष्ट सङ्केत गरेको छ । पोस्टरमा मुख्य कलाकारहरूको भिन्न र चासो जगाउने अवतार देख्न सकिन्छ । सौगात मल्ल हातमा भाले च्यापेर रोचक अवस्थामा देखिन्छन् भने दयाहाङ राई निकै रिसाहा र आक्रामक अवतारमा प्रस्तुत भएका छन् ।

यस्तै सार्वजनिक पोष्टरमा तेरिया मगर टाउकोमा मजेत्रो बेरेकी, जसको अनुहारमा गहिरो दुःख र उदासी झल्किएको देखिन्छ । यता शिशिर वाङ्देल र अर्का एक पात्र भने शान्त मुद्रामा उभिएका छन् । पोस्टरको पृष्ठभूमिमा रहेको फुस्को छानो भएको घर र पहाडी बाटोमा गुड्दै गरेको गाडीले फिल्मलाई थप जीवन्त र रहस्यमयी बनाएको छ । अनिल बुढा मगरको निर्देशनमा तयार भएको यस फिल्ममार्फत डान्स रियालिटी शोहरूबाट विश्वभर चिनिएकी तेरिया फौजा मगरले अभिनेत्रीका रूपमा नेपाली फिल्ममा डेब्यु गर्दैछिन् ।

@parikalanewsofficial

फिल्ममा दयाहाङ, सौगात, तेरिया र शिशिरका साथमा पुष्कर गुरुङ, राज थापा, सुवर्ण थापा, अनु थापा, स्मिता लामिछाने, अरुण पुन मगर, उत्तम राज पाण्डे, सविन कट्टेल, उमेश सोनाम, पवित्रा खड्का, चाहना राना मगर, अनुशा राई र खड्गबहादुर पुन मगर (खबपु) लगायतका कलाकारहरूको ठूलो टोलीको अभिनय रहेको छ । जीएम मुभिज प्रोडक्सनको ब्यानरमा निर्माण भएको ‘मितज्यू’मा जनक घर्ती मगरको लगानी रहेको छ । यो फिल्मको छायाङ्कन शिशिर विशङ्खे, सम्पादन लोकेश बज्राचार्य, श्रीकृष्ण बम मल्लको सङ्गीत तथा उनीसहित मेलिना राई र लक्ष्मी मल्लको स्वर यो फिल्ममा रहेको छ भने आर आर फिल्मस् ले वितरणको जिम्मा लिएको छ ।