इटहरी/ विदेशिएका सन्तान नफर्किउन्जेल आमाबुवाको शव सुरक्षित राख्न सडक नै नपुगेको विकट गाउँमा ‘डीप फ्रिज’ पुर्याउँदा कस्तो उथलपुथल होला ? नेपाली फिल्म वृत्तमा यस्तै नितान्त नौलो र रोचक कथावस्तु बोकेको डार्क कमेडी फिल्म ‘जिरो डिग्री’को छायाङ्कन विधिवत् रूपमा सुरु भएको छ । पोखरा महानगरपालिका–१६ स्थित अर्मलाकोट मन्दिरमा शुभ मुहूर्त गर्दै यस फिल्मको क्यामेरा रोल गरिएको हो ।
मेघौली फिल्म्सको ब्यानरमा निर्माण हुन लागेको यस फिल्मको पहिलो शटमा दिग्गज कलाकार प्रकाश घिमिरे, अभिनेता विजय बराल, तथा कलाकारहरू राजन भुसाल र शारदा सिलवालले अभिनय गरेका थिए । निर्माण पक्षका अनुसार फिल्मको सम्पूर्ण छायाङ्कन कास्की जिल्लाकै अर्मलाकोट र धिताल गाउँका रमणीय तथा मौलिक बस्तीहरूमा हुनेछ । गाउँमा डीप फ्रिज बोकेर उक्लिँदा आइपर्ने रमाइला र अकल्पनीय परिस्थितिहरूलाई पर्दामा उतार्न ३५ दिनको छायाङ्कन कार्यतालिका तय गरिएको छ ।
छायाङ्कनमा जानुअघि नै निर्माण पक्षले ‘अरे हो नेता जी’ बोलको व्यङ्ग्यात्मक गीत सार्वजनिक गरिसकेको छ, जसले दर्शकमा फिल्मप्रति चासो बढाइसकेको छ । यस फिल्मलाई आकाश बराल र साजन काफ्लेले संयुक्त रूपमा निर्देशन गर्दैछन् भने पटकथा पनि उनीहरूकै रहेको छ । फिल्ममा कलाकारहरूको निकै बलियो र अनुभवी लाइनअप देख्न सकिन्छ ।
@parikalanewsofficial
विजय बराल, सनिशा भट्टराई, वसुन्धरा भुसाल, रमेश बुढाथोकी, प्रकाश घिमिरे, लोकेन्द्र लेखक, राजन भुसाल, सन्जोग रसाइली, प्रवेश महतरा क्षेत्री, शारदा सिलवाल, सबिना थापा क्षेत्री, राम बाबु रेग्मी, सुवास गजुरेल र बासु खनाल मुख्य भूमिकामा देखिदैछन् ।
सन्जोग रसाइलीको कास्टिङ रहेको फिल्मको कार्यकारी निर्माता मोती कार्की हुन् भने निशाल पौडेलले छायाङ्कन गर्नेछन् ।फिल्मको सम्पादन चानस पुन मगर र रङ्ग संयोजन राजेन्द्र मोक्ताङले गर्नेछन् । अङ्कित बाबु अधिकारीको सङ्गीत र युवराज काफ्लेको शब्द रचना यो फिल्ममा रहने छन् । फिल्मलाई डिसिएनले काठमाडौं र कुबेर सिने डिस्ट्रिब्युसले काठमाण्डौ बाहिर वितरणको जिम्मा लिएको छ ।
Discussion about this post