इटहरी/ मायालुलाई के उपहार वा चिनो सुम्पिने भन्ने मीठो भावलाई पर्दामा उतार्दै आगामी बैशाख १८ गतेबाट प्रदर्शनमा आउन लागेको फिल्म ‘लालीबजार’ले दर्शकका लागि आफ्नो पहिलो सांगीतिक प्रस्तुति पस्किएको छ । निर्माण पक्षले लोकलयमा आधारित ‘मायालाई के दिउँ म बैना’ बोलको गीत सार्वजनिक गर्दै फिल्मको औपचारिक प्रचारप्रसारको सुरुवात गरेको हो । रमेश बिजीका मिठासपूर्ण शब्दलाई गायक तथा संगीतकार खेम सेन्चुरीले संगीतबद्ध गरेका हुन् ।
यस गीतमा खेमलाई गायनमा गायिका दीपिका बयम्बु मगरले सुमधुर स्वरमा साथ दिएकी छन् । भिडियोलाई निकै भव्य र आकर्षक बनाउन निर्माण पक्षले सेट डिजाइन र कोरसमा कुनै सम्झौता गरेको छैन । प्रदीप लामाको कोरियोग्राफी रहेको यस भिडियोमा अभिनेत्री स्वस्तिमा खड्का, कोरियोग्राफर प्रदीप स्वयं, आशा खड्का र बाल कलाकार समाइरा थापाको ऊर्जाशील नृत्य देख्न सकिन्छ । साथै, फिल्मका मुख्य कलाकारत्रय रवीन्द्रसिंह बानियाँ, मुकुन्द श्रेष्ठ र विशाल देवकोटालाई पनि भिडियोमा आकर्षक शैलीमा प्रस्तुत गरिएको छ । हेर्नुस् भिडियो ।
यसै फिल्ममार्फत विशाल देवकोटा र प्रशंसा सुवेदीले नेपाली फिल्ममा आफ्नो अभिनय यात्रा आरम्भ गरेका छन् । यसका अलावा फिल्ममा अभय बराल, आशा पौडेल, गोविन्द सुनार, प्रेम पाण्डे, आभा अर्याल, तारा शर्मा, रमेश बादी र सरस्वती अधिकारी लगायतका कलाकारहरूको अभिनय रहेको छ । षट्कोण आर्ट्सको ब्यानरमा निर्माण भएको यस फिल्मलाई प्राविधिक र रचनात्मक रूपमा उत्कृष्ट बनाउन अनुभवी टोलीले काम गरेका छन् ।
@parikalanewsofficial
निर्देशक थापा आफैंले लेखेको कथा रहेको यस फिल्ममा यम र प्रदीप भट्टराईले मिलेर पटकथा तथा संवाद तयार पारेका हुन् । फिल्मका कार्यकारी निर्माता प्रदीप भट्टराई हुन् भने म्याक्स दीपेश खत्री र रवीन्द्रसिंह बानियाँले यसमा लगानी गरेका छन् भने सुशन प्रजापतीको छायांकन तथा मित्रदेव गुरुङको सम्पादन रहेको छ । प्रकाश सपूत, खेम सेन्चुरी र जयन जे वाइवाको संगीत र रोहित शाक्य, शैलेश श्रेष्ठको ब्याकग्राउन्ड स्कोर यो फिल्ममा छ ।
Discussion about this post