एक्सन स्टार विराज भट्टको आक्रामक पुनरागमन: ‘राम नाम सत्य’को धमाकेदार टिजर सार्वजनिक

इटहरी/ ‘धागोले बाटेको’ बोलको गीतबाट पहिल्यै दर्शकको मन जितिसकेको बहुप्रतिक्षित फिल्म ‘राम नाम सत्य’ले आफ्नो दमदार टिजर रिलिज गरेको छ । एक्सन, सस्पेन्स र थ्रिलले भरिपूर्ण यस टिजरले नेपाली फिल्म वृत्तमा नयाँ तरंग ल्याइदिएको छ । यसको मुख्य आकर्षण नै सदाबहार एक्सन स्टार विराज भट्टको यसअघि कहिल्यै नदेखिएको डरलाग्दो र ‘एङ्ग्री’ अवतार बनेको छ ।

आगामी चैत २७ गतेलाई प्रदर्शन मिति तोक्दै बक्स अफिसमा आँधी ल्याउने संकेत गरेको यस फिल्मलाई माइकल चन्दले निर्देशन गरेका हुन् । टिजरमा विराजका साथै सुशील श्रेष्ठ, दिव्या रायमाझी, सुपुष्पा भट्ट, आयुष सिंह ठकुरी, सुनिल थापा, प्रशान्त ताम्राकार र खुशी कार्की जस्ता चर्चित अनुहारहरूको सस्पेन्स र प्रेम मिश्रित उत्कृष्ट झल्को देख्न पाइन्छ । हेर्नुस् टिजर ।

कथा तथा पटकथा निर्देशक चन्द आफैंले लेखेको यस फिल्ममा अभिमन्यू निरवी र समय थपलिया स्क्रिप्ट सल्लाहकारका रूपमा रहेका छन् । साहिल खानले तयार पारेको यो एक्सन-प्याक्ड टिजरलाई मानकृष्ण महर्जनको उत्कृष्ट छायांकन, श्री श्रेष्ठको द्वन्द्व निर्देशन, बन्दे प्रसादको सम्पादन र काला चरणको ब्याकग्राउन्ड म्युजिकले झनै जीवन्त बनाएको छ ।

@parikalanewsofficial

माइकल इन्टरटेन्मेन्टको ब्यानरमा निर्माण भएको यस फिल्ममा उपेन्द्र शाही र स्वेता बिमलीको मुख्य लगानी छ । त्यस्तै, किशोर भट्ट, राजेन्द्र भट्ट र अर्जुन सुनार कार्यकारी निर्माता, मोती कार्की क्रियटिभ निर्माता र राजेन्द्र आचार्य लाइन प्रोड्युसर रहेका छन् । फिल्ममा बाबुल गिरी, अर्जुन पोखरेल, एसडी योगी र नवा अन्सारीको संगीत सुन्न सकिन्छ । गीतले बनाएको हाइप र अहिले सार्वजनिक भएको आक्रामक टिजर हेर्दा फिल्मले दर्शकको उल्लेख्य साथ पाउनेमा निर्माण पक्ष पूर्ण रूपमा विश्वस्त देखिएको छ ।