पानी ल्याउन ढिला हुँदा प्रकाश र सुहानाको झगडा, छुट्याउन पुगेका सौगात नै परे फसादमा

इटहरी/ नेपाली साहित्यका अग्रज गुरुप्रसाद मैनालीको चर्चित कथा ‘परालको आगो’ अब नयाँ प्रविधि र आधुनिक स्वरूपसहित ठूलो पर्दामा आउँदैछ । अन्तर्राष्ट्रिय नारी दिवसको अवसर पारेर गाउँले परिवेशको पोस्टर सार्वजनिक गरेको निर्माण टोलीले लगत्तै ओएसआर डिजिटल युट्युब च्यानलमार्फत फिल्मको अफिसियल टिजर दर्शकमाझ ल्याएको हो । सार्वजनिक टिजरले मुख्यतया नेपाली ग्रामीण समाजको यथार्थ र दाम्पत्य जीवनभित्रको मनमुटाबलाई जीवन्त रूपमा प्रस्तुत गरेको छ ।

पत्नी पँधेरोबाट पानी लिएर फर्कन ढिला भएको निहुँमा पतिले हातपात गरेको मार्मिक दृश्य टिजरमा समावेश छ । यसमा पति–पत्नीको भूमिकामा प्रकाश सपुत र सुहाना थापा देखिएका छन् । झगडा साम्य पार्न छिमेकीको भूमिकामा रहेका अभिनेता सौगात मल्ल र उनकी पत्नी आइपुग्छन् । तर, प्रकाश सपुतले “लोग्नेस्वास्नीको झगडामा अरू नपरेकै राम्रो” भन्ने संवाद बोल्दै नेपाली समाजको परम्परागत मनोविज्ञानलाई उजागर गरेका छन् । हेर्नुस् टिजर ।

पहाडी जनजीवन, डोको–नाम्लो र गाउँले रहनसहनका दृश्यले फिल्मलाई अत्यन्तै मौलिक र यथार्थपरक बनाएको छ । हरि ॐ सिने मेकर्स प्रा.लि.को ब्यानरमा सुशील पोखरेलद्वारा निर्मित फिल्म लक्ष्मण सुनारको निर्देशनमा तयार भएको हो भने पटकथा तथा संवाद सुशील देवकोटाले लेखेका हुन् । फिल्ममा प्रकाश सपुत, सुहाना थापा र सौगात मल्लका साथमा सिर्जना अधिकारी, किशोर भण्डारी, ज्याक श्रेष्ठ, सरिता भण्डारी, रेणु न्यौपाने र बालकलाकार मन्जिला बानियाँको अभिनय रहेको छ ।

@parikalanewsofficial

मैनालीको ‘नासो’ कथासङ्ग्रहमा सङ्ग्रहित यसै कथामा आधारित रहेर ४५ वर्षअघि निर्देशक प्रताप सुब्बाले पनि ‘परालको आगो’ निर्माण गरेका थिए । निर्माता पोखरेलका अनुसार पुरानो कथाको मूल मर्म र आत्मालाई मर्न नदिई आधुनिक र उत्कृष्ट प्रविधिको प्रयोग गरेर यसको पुनर्निर्माण गरिएको हो । नेपाली मौलिकताले भरिपूर्ण यो फिल्म आगामी वैशाख ११ गतेदेखि देशभरका फिल्म हलहरुमा एकसाथ प्रदर्शनमा आउँदैछ ।