३ पूर्व मिस नेपाल र दिग्गज कलाकारका साथ ‘माया भनेकै यस्तो होला’को सुटिङ सुरु

इटहरी/ नेपाली फिल्म क्षेत्रकी चर्चित अभिनेत्री रेखा थापा पुनः निर्देशनमा फर्किएकी छन् । झण्डै ८ वर्षको अन्तरालपछि निर्देशनमा कमब्याक गरेकी रेखाको नयाँ फिल्म ‘माया भनेकै यस्तो होला’ को छायांकन सोमबारबाट काठमाडौंको शिवपुरीस्थित रोयल ट्युलिप नेशनल पार्कबाट औपचारिक रूपमा सुरु भएको छ । ‘हिम्मतवाली’ र ‘मालिका’ जस्ता सफल फिल्मको अनुभव सँगालिसकेकी रेखा यसपटक यो फिल्ममा कलाकारको रुपमा भने देखिने छैनन् ।

उनी सम्पूर्ण रूपमा क्यामेरा पछाडि बसेर फिल्मको कमान्ड सम्हाल्दै छिन् । सधैं आफ्नै होम प्रोडक्सन ‘रेखा फिल्मस्’ बाट फिल्म निर्माण गर्दै आएकी रेखाले यसपटक भने ‘दिया एण्ड अमु फिल्मस्’ को ब्यानरमा बाहिरी प्रोजेक्टको निर्देशन गर्दैछिन् । हरि नारायण श्रेष्ठ र माया देवी श्रेष्ठले निर्माण गर्न लागेको यस फिल्मको कथा ध्रुव लम्सालले लेखेका हुन् । रोचक कुरा के छ भने, लेखक लम्साल पनि करिब एक दशकपछि फिल्म लेखनमा फर्किएका हुन् । यस फिल्मलाई स्टार-स्टडेड अर्थात् मल्टी-स्टारर भन्दा फरक पर्दैन ।

वरिष्ठ कलाकार मदनकृष्ण श्रेष्ठ र लामो समयपछि पर्दामा फर्किएका अभिनेता दिल श्रेष्ठ मुख्य भूमिकामा छन् । यसका साथै, ३ जना पूर्व मिस नेपाल र ब्युटी क्विनहरू-सृष्टि श्रेष्ठ, नम्रता श्रेष्ठ र नीति शाह (पूर्व मिस नेपाल इन्टरनेसनल) को एकसाथ उपस्थिति फिल्मको प्रमुख आकर्षण बनेको छ । यसबाहेक फिल्ममा लक्ष्मी गिरी, विशाल पहाडी, रवी डंगोल ‘बेमान’, संगम भण्डारी, सुजाता श्रेष्ठ, बिनोद पौडेल लगायतका कलाकारहरूको सशक्त अभिनय रहनेछ । गत फाल्गुन ३ गते महाशिवरात्रीमा घोषणा हुँदा सार्वजनिक गरिएका दुई पोस्टरले फिल्मको विषयवस्तुलाई प्रस्ट्याएको थियो ।

@parikalanewsofficial

एउटा पोस्टरमा रातो पहिरनमा सजिएका तीन अभिनेत्रीका साथमा दिल श्रेष्ठ देखिएका छन् । जहाँ नम्रता र दिलको सामिप्यता झल्किन्छ भने सृष्टि र नीतिको अनुहारमा गम्भीर भाव देखिन्छ । यस्तै अर्को पोस्टरमा ह्विलचेयरमा रहेका मदनकृष्ण श्रेष्ठको हात समातेर भुइँमा बसेका दिल श्रेष्ठलाई देखाइएको छ, जसले सन्तानको कर्तव्य र बुढेसकालको सहाराको मर्मस्पर्शी कथा बोल्ने सङ्केत गर्छ । प्रेमको वास्तविक परिभाषा खोज्ने यो फिल्मले सुमधुर प्रेमकथासँगै सामाजिक भावनालाई पनि उधिन्नेछ ।

प्रोडक्सन हेड सीएम भारद्वाज सुवेदीका अनुसार, चुनाव र पछिल्लो परिस्थितिले गर्दा फागुन दोस्रो साताको तालिका केही दिन धकेलिएर सुटिङ सुरु भएको हो । अब करिब एक महिनासम्म काठमाडौं आसपासका रमणीय स्थानहरूमा यसको छायांकन चल्नेछ । फिल्मलाई सुदिप बरालले छायांकन गर्नेछन् भने प्रमुख सहायक निर्देशकको रुपमा अनिरुद्ध आत्रेय रहेका छन् । यो फिल्मको गीतमा प्रशान्त सिवाकोटीको संगीत रहेको छ । निर्माण टोलीले यो पारिवारिक तथा प्रेमकथामा आधारित फिल्मलाई आगामी वर्षको तीजको अवसर पारेर देशभरका हलहरूमा प्रदर्शन गर्ने लक्ष्य राखेको छ ।