निशा शर्माको ३० वर्षपछिको ‘कमब्याक’ र आँचलको नयाँ अवतार: ‘एक मुठ्ठी बादल’ को प्रदर्शन मिति तय

इटहरी/ समाजको एउटा कुनामा गुम्सिएका सपना र तीन पुस्ताका महिलाहरूको भावनात्मक उकुसमुकुसलाई पर्दामा उतार्न तयार फिल्म ‘एक मुठ्ठी बादल’ को प्रदर्शन मिति तय भएको छ । अन्तर्राष्ट्रिय महिला दिवसको विशेष सन्दर्भ पारेर निर्माण पक्षले फिल्मको मर्म बोल्ने ‘फर्स्टलुक पोस्टर’ सार्वजनिक गर्दै आगामी जेठ १ गतेलाई रिलिज डेट तोकेको हो ।

सहारा शर्माको लेखन तथा निर्देशनमा तयार भएको यो फिल्मले द्रुत गतिमा परिवर्तन भइरहेको नेपाली समाज र त्यसभित्र परिवारका सदस्यहरूबीचको अपेक्षा, त्याग र व्यक्तिगत आकांक्षाको द्वन्द्वलाई रोचक ढंगले प्रस्तुत गर्नेछ । फिल्ममा वर्तमान पुस्ताकी चर्चित अभिनेत्री आँचल शर्मा र करिब तीन दशकपछि अभिनयमा फर्किएकी वरिष्ठ रंगकर्मी निशा शर्माको मुख्य अभिनय रहेको छ ।

यसले नेपाली फिल्मको दुई फरक कालखण्डलाई एउटै पर्दामा जोड्ने काम गरेको छ । प्रदर्शन हुनुअघि नै यो फिल्मले ‘युरोपियन पोस्ट-प्रोडक्सन ग्रान्ट ह्युबर्ट बल्स फन्ड’ प्राप्त गरेर नेपाली फिल्मको इतिहासमा एउटा इँटा थपिसकेको छ । भियतनामकी लिन्ह डान गुयेन फानको छायांकन, भारतकी दीपा भाटियाको सम्पादन र थाइल्यान्डमा गरिएको कलर ग्रेडिङले फिल्मलाई प्राविधिक रूपमा निकै मजबुत बनाएको छ । फिल्मको मुख्य भूमिकामा आँचल शर्मासँगै निशा शर्मा, उषा रजक, भिमा मैनाली लगायतको अभिनय रहेको छ ।

गौंथली इन्टरटेनमेन्ट र मन प्रडक्सनको संयुक्त ब्यानरमा निर्माण भएको फिल्मको निर्मातामा अभिमन्यु दीक्षित रहेका छ भने निकुन श्रेष्ठ कार्यकारी निर्माता हुन् । यो फिल्मलाई आरआर फिल्म्सले वितरण गर्नेछ । फिल्ममा अस्मिता गौतम, शेखर चापागाईँ, मनिष निरौला, सहयोग अधिकारी लगायतका कलाकारहरूको पनि सशक्त अभिनय रहेको छ । जर्मनका सारा फाजिलात सहित सामीप्य राज तिमल्सेना र अनुप पौडेल पनि निर्माण टोलीमा आबद्ध छन् ।