निर्वाचनको रापतापबीच ‘राम नाम सत्य’को गीतले युट्युवमा पायो २ हप्तामा २२ लाख भ्युज

इटहरी/ यतिबेला मुलुक निर्वाचनको चर्चा र मतपरिणामको दौडमा केन्द्रित छ । तर, यही राजनीतिक सरगर्मीका बीच नेपाली फिल्म जगतको एउटा गीतले भने डिजिटल प्लेटफर्ममा छुट्टै ‘हंगामा’ मच्चाइरहेको छ । आउँदो चैत्र २७ गते प्रदर्शनको तयारीमा रहेको प्रतीक्षित फिल्म ‘राम नाम सत्य’ को पहिलो गीत ‘धागोले बाटेको’ ले सार्वजनिक भएको छोटो समयमै दर्शकको मन मात्र जितेको छैन, युट्युब र टिकटकमा तथ्याङ्कको नयाँ उचाई समेत छोएको छ । यो गीतको भिडियोले युट्युबमा मात्र १३ दिनको अवधीमा २२ लाख प्लस भ्युज प्राप्त गरेको छ ।

यस्तै टिकटकमा १ लाखभन्दा बढी प्रयोगकर्ताद्वारा भिडियो निर्माण गरिएको छ । यो गीतको भिडियोमा फिल्मका मुख्य जोडी विराज भट्ट र सुपुष्पा भट्टको लोभलाग्दो रोमान्टिक केमेस्ट्री देख्न सकिन्छ । फिल्मका निर्देशक माइकल चन्द भन्छन्, “निर्वाचनको बेला गीत सार्वजनिक गर्दा धेरैले जोखिमपूर्ण समय भन्नुभएको थियो, तर हामीलाई कन्टेन्टमा भरोसा थियो । आज गीत दर्शकको ओठमा झुन्डिएको छ, यसले फिल्मको व्यावसायिक सफलतामा ठुलो ऊर्जा थपेको छ ।” हेर्नुस् भिडियो ।

माइकल इन्टरटेन्मेन्ट हाउसको ब्यानरमा निर्माण भएको यो फिल्मले ‘पर्दा पछाडिको पर्दा’ को गम्भीर र चाखलाग्दो थिम बोकेको छ । उपेन्द्र शाही र स्वेता बिमलीको लगानी रहेको यस फिल्ममा लभ स्टोरी मात्र नभई, शक्तिशाली एक्सन र सस्पेन्स कथाको फ्युजन गरिएको छ । यो गीतमा स्वर बाबुल गिरी र रचना रिमालको रहेको छ भने शब्द/सङ्गीत डा. डी आर उपाध्याय र बाबुल गिरीको रहेको छ ।

@parikalanewsofficial

प्रतिक्षित मानिएको यो फिल्ममा विराज भट्ट र सुपुष्पा भट्टको अलावा सुशील श्रेष्ठ, दिव्या रायमाझी, आयुष सिंह ठकुरी, प्रशान्त ताम्राकार र सुनील थापा लगायतका कलाकारको अभिनय देख्न सकिन्छ । मानकृष्ण महर्जनको छायाङ्कन, श्री श्रेष्ठको द्वन्द्व, सियोन श्रेष्ठको नृत्य र बन्दे प्रसादको सम्पादन यो फिल्ममा रहेको छ । गीतले बजार तताएपछि निर्माण पक्ष अब फिल्मको टिजर सार्वजनिक गर्ने अन्तिम तयारीमा जुटेको छ । साहिल खानले तयार पारेको टिजर र ट्रेलरले फिल्मको ‘सस्पेन्स’ पाटोलाई अझ प्रस्ट पार्ने विश्वास गरिएको छ । किशोर भट्ट, राजेन्द्र भट्ट र अर्जुन सुनार कार्यकारी निर्माता रहेको यस फिल्मका स्क्रिप्ट सल्लाहकार अभिमन्यु निरवी र समय थपलिया हुन् ।